Константиновкадагы супермаркетке урулган соккудан тогуз адам каза тапты.
Бул тууралуу Украинанын Донецк облусунун башчысы Вадим Филашкин Телеграм-каналында жазды.
Орусиянын Липецк шаарынын жанында пилотсуз учактардын чабуулунан аскердик аэродромдо өрт тутанганын Чукул кырдаалдар министрлигинин регионалдык башкармалыгы кабарлады.
Astra телеграм-каналынын маалыматына ылайык, аэродромдо ок-дары сакталган кампаны өрт чалды.
Облус губернатору Игорь Артамонов таңкы билдирүүсүндө сокку тууралуу сөз кылган жок. Анын айтымында, Липецк дрондордун жапырт чабуулуна кабылды, “жарандык имараттардан алыс орун алган” жардыруучу заттар жайында детонация болду. Анын кесепетин жоюу үчүн өзгөчө кырдаал режими киргизилди, коомдук транспорт иштебей, иш-чараларды өткөрүүгө тыюу салынды.
Маалыматка караганда, аэродромдун жанындагы 4 айылдын тургундары эвакуацияланып жатат.
Губернатор Липецкиде энергетикалык инфраструктуранын объектиси жабыркаганын, 5 кичи район бир нече саатка электр жарыгысыз калганын кошумчалады. Чабуулдан кеминде 9 киши жарадар болду.
Орусиянын Коргоо министрлиги жумага караган түнү Липецк облусунда 10 пилотсуз учак атып түшүрүлгөнүн билдирди. Андан тышкары Белгород, Курск, Брянск, Воронеж жана Орел аймактарында 26, аннексияланган Крымда 5 дрон жок кылынганы маалымдалды.
Согуш шартында мындай билдирүүлөрдү текшерүү мүмкүн эмес.
Киев бийлиги Липецкидеги чабуул тууралуу билдирүү жасаган жок.
Анын алдында, 6-августта Украина менен чек арага жакын жайгашкан Курск облусуна чабуул жасалган. Ошондон бери салгылашуу уланууда.
Айрым Телеграм-каналдар украин армиясы бир нече кыштакты ээлегенин жазышкан. Орусиянын Коргоо министрлиги украиналык бир миңдей аскери, 20дан ашуун танк жана брондолгон машине менен кирип барганын кабарлаган. Президент Владимир Путин Киевди “масштабдуу чагымчылдык” үчүн айыптады.
Бирок окуянын чоо-жайы бүдөмүк калууда. Украин бийлиги операция тууралуу маалыматты расмий бышыктаган жок. Бирок президент Владимир Зеленский 8-августтагы кечки кайрылуусунда Орусия кол салуусунун кесепетин “сезиши” керек деп айтты.
Орусиянын Коргоо министрлиги Украина менен чек арага жакын жайгашкан Курск облусунун Сужа жана Коренево райондоруна жасалган чабуулдун мизин кайтарганын билдирди.
8-августта тараткан билдирүүсүндө министрлик "Түндүк" аскердик отряды жана чек ара аскерлери украин күчтөрүнүн алдыга жылуу аракеттерине тоскоолдук жаратканын маалымдады.
Ага чейин министрлик Курск облусунда беш ракета жана алты дронду, Белгород облусунда 14 учкучсуз аппаратты атып түшүргөнүн кабарлаган. Белгород облусунун губернатору Вячеслав Гладков украин күчтөрүнүн аткылоосунан бир киши мүрт кетип, дагы бири жараат алганын жазды.
7-августта Курск облусунун губернаторунун милдетин аткаруучу Алексей Смирнов аймакка өзгөчө кырдаал режимин киргизген. Орусиянын мурдагы президенти, учурда Коопсуздук кеңешинин төрагасы орун басары Дмитрий Медведев орус армиясын Украинанын аймактарына терең кирип барууга чакырды.
Украина менен чек арага жакын жайгашкан Курск облусуна 6-августтун таңында чабуул жасалган. Ошондон бери салгылашуу уланууда. Айрым Телеграм-каналдар украин армиясы бир нече кыштакты ээлегенин жазышты. Орусиянын коргоо министри украин күчтөрү 300дөй аскер, ондон көп танк жана брондолгон машине менен кирип барганын кабарлады. Президент Владимир Путин Киевди “масштабдуу чагымчылдык” үчүн айыптады. Ал эми украин бийлиги Курскиде болуп жаткан окуялар тууралуу үн ката элек.
Орусиянын Курск облусунда эки күн катары менен айыгышкан салгылашуулар уланууда. Президент Владимир Путин Киевди "масштабдуу чагым" уюштуруп жатат деп сындады. Кремлчил блогерлер украин армиясы бир нече айылды басып алганын жазып жатышат. Украин бийлиги бул тууралуу үн ката элек.
Орусиянын президенти Владимир Путин Киевди чек аралаш аймактагы Курск облусунда жарандык жайларды жана инфратүзүмдөрдү "абадан аткылады" деп айыптады.
7-августтагы өкмөттүн жыйынында Путин операцияны “масштабдуу чагым” деп атады.
“Киев режими кезектиги масштабдуу чагымын баштап, жарандык имараттарды, турак жайларды, "Тез жардам" машинелерин ар кандай курал менен башаламан аткылай баштады”, - деди орус президенти.
Орусиянын президентинин билдирүүсүн көз карандысыз булактардан ырастоо мүмкүн эмес.
Ошол эле күнү Курск облусунун губернаторунун милдетин аткаруучу билдиргендей, Сужа шаарынын аймагында украин дронунун соккусунан эки киши мүрт кетти. Алексей Смирнов украиналык дрон жүрүп бараткан "Тез жардам" машинесине тийип, ичиндеги айдоочу жана фельдшер жан бергенин Телеграм-каналы аркылуу билдирди. Дагы бир дарыгер жараат алганы маалым болду. Смирновдун сөздөрүн көз карандысыз булактардан ырастоо мүмкүн эмес.
Смирнов ошондой эле тургундарды кан тапшырууга чакырды.
"Вёрстка" басылмасы Сужада мобилдик байланыш, электр жарыгы жана суу өчүрүлгөнүн жазды.
Аймакта аскердик кагылышуулар башталганы тууралуу маалыматтар 6-августка караган түнү тарай баштаган. Сужа шаары Украинадан өтө алыс эмес жайгашкан. Украинанын Сумы облусунун чек арасынан 10 чакырымдай аралыкта орун алган.
Орусиянын Коргоо министрлиги 300дөй аскер, 11 танк жана 20дай чопкутталган машине Курск облусунун чек арасынан өтүп, Николаево-Дарьино жана Олешня калктуу конуштарындагы орус армиясынын турумдарына чабуул койгонун билдирген.
Москва орус армиясы чабуулдардын мизин артиллерия, аскердик учактар жана дрондор менен кайтарылганын, украин аскерлери чоң жоготууларга учурап, артка чегингенин кошумчалады.
Украин армиясы бир нече айылды басып алдыбы?
Анткен менен кремлчил блогерлер 7-августта украин армиясы Суженск районундагы Николаево-Дарьино жана Свердликово айылдарын өз карамагына алышканын жазышты.
Алардын сөзүнө караганда, украин аскерлери ошондой эле Гончаровка жана Олешня айылдарын басып алуу аракетин көрүүдө.
Украин тарап Орусиянын Курск облусунда болуп жаткан окуяларга расмий комментарий бере элек.
Ал эми украиналык Телеграм-каналдар жарыялаган кадрларда туткунга түшкөн орус аскерлерин көрүүгө болот. "Важные истории" басылмасынын журналисттери кеминде алты орус аскери колгон түшкөнүн ырасташууда.
Андан тышкары Орусиянын Коргоо министрлиги 7-августтун таңында украин тараптан учурулган 11 дрон атып түшүрүлгөнүн билдирди.
“Күзөттө турган абадан коргонуу системалары Белгород облусунда үч, Курск облусунда төрт, Воронеж облусунда эки, Ростов облусунда эки учкучсуз аппатта жок кылды”,- деп жазды министрлик Телеграмга.
2023-жылы "Орус ыктыярчылар тобу" жана "Орусияга эркиндик" (Орусияда террордук деп таанылган уюмдар) легиону Брянск, Курск жана Белгород облустарына кирип барган.
Бул жолку чабуул такыр башкача экенин кабарланууда. Курскиге жасалган кол салууга көп адам катышып, координация ыкчамдыгы жана тактыгы менен айырмаланарын белгилеп жатышат.
Ал арада Украина орус армиясынын 30дан ашуун дронун жети облуста атып түшүргөнүн билдирди. Киевде абадан кулатылган учкучсуз аппараттын калдыгы карапайым тургунга тийип, жараат алды.
Жалысынан Киев облусун аткылоо сегиз саатка созулганын, атып түшүрүлгөн дрондордун калдыктарынан ондогон турак жайлар талкаланганын аскердик администрациянын жетекчиси Руслан Кравченко билдирди.