Украинадагы соңку кырдаал (28-29-30-июлдагы маалыматтар)
Орусияда коргоо министринин мурдагы орун басары, генерал Дмитрий Булгаков кармалды. Бул тууралуу Тергөө комитети кабарлады. Маалыматка караганда, буга коррупция боюнча козголгон иш түрткү болду. ТАСС генерал Москвадагы "Бутырка" убактылуу кармоочу жайына киргизилгенин жазды.
Коргоо министрлигинде Булгаков материалдык-техникалык камсыздоо үчүн жооптуу болгон. Ал министрдин орун басары кызматын 2008-жылдан 2022-жылга чейин аркалаган. 2016-жылы ага Орусиянын Баатыры наамы ыйгарылган.
Буга чейин ири көлөмдөгү пара алууга шек саналып коргоо министринин мурдагы орун басары Тимур Иванов жана министрликтин кадрларды башкаруу бөлүмүнүн жетекчиси, генерал-лейтенант Юрий Кузнецов камалган.
Ал эми май айында Башкы штабдын жетекчисинин орун басары Вадим Шамарин колго түшкөн. Ал да ири көлөмдөгү пара алууга шек саналып жатат.
17-майда генерал-майор Иван Попов кармалган. Тергөөнүн версиясына караганда, ал Запорожье багытында тосмолорду курууга бөлүнгөн 1700 тонна металлды кымырып алууга шектелүүдө. Июль айынын ортосунда ал үй камагына чыгарылган.
Орусия Украинага кол салып, бастырып киргенден бери кеминде 61 009 орусиялык аскер мерт болду. Бул тууралуу Би-Би-Си менен "Медиазона" басылмасы ачык булактарга таянып чогуу аныктап чыкты.
Алардын маалыматына ылайык, набыт болгондордун дээрлик жарымы согуш башталганга чейин орус армиясы менен байланышта болгон эмес. Некрологдордун басымдуу бөлүгүндөгү алардын формачан эмес түшкөн сүрөттөрү тиркелген.
Би-Би-Си учурда расмий Москва согушка жаңы адамдарды тартуу аракетин жандантканын, Орусиянын кеминде он аймагында жаңы келишим түзгөндөргө төлөнчү акчанын көлөмү бир топ көбөйгөнүн билдирди.
Журналисттер согушта ажал тапкандардын аты-жөнүн, тек-жайын жергиликтүү бийликтердин айткандары, маркумдардын жакындары бөлүшкөн кабарлар, көрүстөндөр өңдүү ачык булактардан алынган маалыматтын негизинде тактап келет. Иликтөөчүлөр реалдуу сан кеминде мындан эки эсеге көп экенин белгилешет.
Москва менен Киев уруштагы жоготууларын ачыкка чыгарышпайт. Согушкан тараптар адатта өз жоготууларын азайтып, душмандыкын көбөйтүп көрсөткөнгө аракет кылат.
Орус армиясы Украинадагы энергетикалык жайларга сокку урду
Орусиянын армиясы 26-июлга караган түнү Украинанын аймактарына 22 "Шахед" дрондору жана "Искандер-М" баллистикалык ракетасы менен сокку урду. Бул тууралуу украин армиясынын Аба күчтөрүнүн командачысы Николай Олещук билдирди. Маалыматка ылайык, дрондордун көбү Херсон, Сумы, Житомир жана Чернигов облустарында атып түшүрүлгөн.
"Укрэнерго" билдиргендей, учкучсуз аппараттардын чабуулунан Житомир жана Чернигов облустарындагы энергетикалык жайлар жабыркады. Жыйынтыгында Житомир аймагынын тургундары электр жарыгысыз калды. Облустун аскердик администрациясынын жетекчиси Вячеслав Чаус Нежин шаарындагы инфратүзүм объектисине жана жатаканага сокку урулганын жазды. Бир киши жараат алганы маалым болду.
Ал эми фронтто соңку бир суткада 147 аскердик кагылышуу катталган. Айыгышкан салгылаштар Покров багытында жүргөнүн 26-июлдагы билдирүүсүндө украин Куралдуу күчтөрүнүн Башкы штабы кабарлады.
Соңку айларда фронт тилкесинде радикалдуу өзгөрүүлөр болгон жок. Орус армиясы негизги күчүн Покров багытына салып, стратегиялык деп саналган Покровск-Константиновка кан жолун тороп салууну көздөп жатышат.