Соңку жарым жылдын ичинде Украинадагы согушта Орусия бери дегенде 10 014 аскерин жоготту.
Бул тууралуу Би-Би-Си менен "Медиазона" басылмасы ачык булактарга таянып чогуу аныктап чыкты.
Алардын маалыматына ылайык, Орусия Украинага кол салып, бастырып киргенден бери кеминде 56 168 орусиялык жаран набыт болду.
Мерт болгондордун арасында мобилизацияга тартылгандар жана абактан согушка жөнөтүлгөндөр да көп.
Журналисттер согушта ажал тапкандардын аты-жөнүн, тек-жайын жергиликтүү бийликтердин айткандары, маркумдардын жакындары бөлүшкөн кабарлар, көрүстөндөр өңдүү ачык булактардан алынган маалыматтын негизинде тактап келет. Иликтөөчүлөр реалдуу сан кеминде мындан эки эсеге көп экенин белгилешет.
Москва менен Киев уруштагы жоготууларын ачыкка чыгарышпайт. Ошондой эле согушкан тараптар адатта өз жоготууларын азайтып, душмандыкын көбөйтүп көрсөткөнгө аракет кылат.
Донецк облусунун Мирноград, Лиман жана Константиновка шаарларына жума күнү Орусиянын соккусунда кеминде алты адам мерт болуп, дагы 19 жаран жараат алды. Бул тууралуу Украинанын Өзгөчө кырдаалдар кызматы кабарлады.
Облустун аскердик администрациясынын башчысы Вадим Филашкиндин билдиришинче, Мирноградда эки жерде жардыруу болгон, бомбалардын бири административдик имараттын, экинчиси аялдаманын жанында жарылган. Бул соккуда алты адам мерт болуп, тогуз киши, алардын арасында бир бала жараат алды.
Константиновкада авиабомба ишканалардын биринин аймагына түшүп, эки жумушчунун өмүрү кыйылып, үчөө жараат алды. Ал эми Лимандагы соккуда жети киши жараат алды.
Орусия Донецкинин фронто жакын аймактарына күн сайын чабуул жасап жатат.
Москва Украинанын калктуу конуштарын атайлап бутага алат деген дооматтарды четке кагып келет.
Украина бүгүн 12-июлда Орусиянын чабуулдарынан 13 киши жабыркаганын, алардын бирөөнү сактап калуу мүмкүн болбогонун билдирди. Улуттук полициянын маалыматына караганда, орусиялык аскерлер Донецк облусундагы Мирноград шаарын бутага алып, башкарылуучу беш авиабомба менен сокку урду.
15 жаштагы бала ошол жерден каза болгону, 13 жаштагы кыз жана бала жараат алганы, жалпысынан 13 киши жабыркаганы, 43 үй, эки окуу жай имараты, дүкөн, автомашиналар талкаланганы маалымдалды.
11-июлдун кечинде Орусия Украинанын аймагына стратегиялык авиация учактары алып жүрүүчү Х-101 канаттуу ракеталарынан бешти, ал эми түндө Shahed дрондорунан 19ду учурганын өлкөнүн Куралдуу күчтөрүнүн Аскердик аба күчтөрүнүн командачысы Николай Олещук кабарлады.
Анын айтымында, негизинен Хмельницкий облусундагы Староконстантинов шаары бутага алынды. Ракеталар Сумы жана Черкасск облустарында, жанкечти дрондор Николаев, Киев, Винница, Хмельницкий, Херсон жана Сумы облустарында да атып түшүрүлдү.
АКШ президенти Жо Байден шейшембиде НАТОнун саммитинде сүйлөп жатып, Украинага зениттик-ракеталык системалар берилерин жарыя кылды.
"Кошмо Штаттар Украина биз экспорттоп жаткан абадан коргонуучу системаларды биринчилерден болуп алышы үчүн болгон мүмкүнчүлүгүн жумшайт", - деди ал.
АКШ, Германия жана Румыния Киевге Patriot зениттик-ракеталык системасынан бирден беришет. Нидерланд дагы башка өлкөлөр менен чогулуп дагы бирди беришет. Байдендин сөзүнө караганда, Украинага жыл соңуна чейин аймагын Орусиянын ракеталарынан коргоочу жүздөгөн системалар берилмекчи.
Жо Байден Украинаны колдоо уланарын билдирди. Ал Вашингтондо өтүп жаткан саммиттин катышуучуларына кайрылып:
"Путин Украинаны толук баш ийдиргиси келет, украин демократиясына чекит коюп, украин маданиятын жок кылып, Украинаны мамлекет катары дүйнөлүк картадан өчүрүүнү каалайт. Биз билгендей, Путин муну менен токтоп калбайт. Бирок адашпообуз керек: Украина Путинди токтото алат, колунан келет", - деди.
АКШ президенти ошондой эле америкалыктардын көпчүлүгү НАТО альянсы дүйнөнүн коопсуздугун сактарын билишерин белгиледи: "Америкалыктар билишет, биз досторубуз менен чогуу аракеттенген учурда бекембиз".
Украин президенти Владимир Зеленский 9-июлда Вашингтонго баргандан кийин, НАТОго мүчө өлкөлөргө кайрылып, абадан коргонуучу системаларды, кыргын салуучу учактарды жана кошумча коопсуздук кепилдигин суранарын билдирген. Ал дээрлик согуш башталгандан бери Батышты өлкөнүн абадан коргонуу системасын бекемдөөгө, алыска жете алуучу курал-жарак жагынан жардамдашууга чакырып келген.