Бээжинде Кытайдын төрагасы Си Цзинпиндин Венгриянын премьер-министри Виктор Орбан менен жолугушуусу өткөнүн бүгүн 8-июлда "Синхуа" мамлекеттик маалымат агенттиги билдирди.
Кытай басма сөзү жолугушууда негизги тема Украина маселеси болгонун жазып жатышат. CCTV телеканалы Си дүйнөлүк державалар Орусияга жана Украинага тынчтык сүйлөшүүлөрүн баштоого жардам бериши, тезирээк тынчтык орнотуш үчүн эки тарапка тең «позитивдүү таасир» этиши керек деп айтканын, кытай тарап тынчтык сунуштарын бергенин маалымдады.
1-июлда Европа Биримдигиндеги жарым жылдык төрагалык кызматка киришкен Венгрия өкмөтүнүн башчысы алгачкы бир апта ичинде ушуну менен үчүнчү өлкөгө барышы. Бул сапарларын ал өзү «тынчтык орнотуу миссиясы» деп атоодо.
Алгач Киевде украин президенти Владимир Зеленский, андан кийин Москвада орус президенти Владимир Путин менен жолугушуу өткөргөн Орбан Швейцариянын Die Weltwoche басылмасына 6-июлда курган маегинде жаңы аптада да Украинадагы боюнча сүйлөшүүлөрдү улантарын айткан.
2-июлда Украинага барганда ал Орусия менен сүйлөшүү баштоо үчүн атышууну токтотууну сунуш кылган. Зеленский атышууну андан кийин эмне кылуу керектиги жөнүндө так план жок шартта токтотуу согуштун аякташына алып келбей турганын, жөн гана убактылуу «тоңдуруп» коюу болорун жолугушуудан кийин Bloomberg басылмасынын суроолоруна жооп берип жатып айткан.
Ошону менен катар украин лидери согуш Киев үчүн да, бүт дүйнө үчүн да акыйкат шартта токтошу үчүн АКШ менен Кытай ички пикир келишпестигин жоюп, Орусия менен сүйлөшүүлөргө биргелешип ортомчу болушу зарыл экенин белгилеген.
5-июлда Кремлде Орбан менен жолугушууда Орусия президенти Владимир Путин Москва Украинанын кайсы аймактарын аннексиялап алган болсо, ошол жактагы украин аскерлеринин чыгып кетишин талап кылган.
Орбан эки өлкөнүн башчылары менен жолугушууларынан кийин Киев менен Москванын позицияларында чоң айырмачылык бар экенин билдирген.
Евробиримдик жетекчилигинин өкүлдөрү жана мүчө өлкөлөрдүн айрымдарынын лидерлери Орбандын билдирүүлөрүнө жана соңку аракеттерине анча ишене бербеген мамилесин айтып, ал орусиячыл саясатчы экенин эсертип белгилеп жатышат.
Орусиянын Украина менен чектешкен Воронеж облусунун айрым аймактарында дрон чабуулдарынан улам өзгөчө кырдаал режими жарыяланды. Анын жыйынтыгында курал-жабык кампасында өрт тутанган.
Облус губернатору Александр Гусев кол салууну Украинадан көрдү. Ал кошумчалагандай, 7-июлга караган түнү чабуул койгон учкучсуз аппараттын баары атып түшүрүлгөн, ал эми кампадагы өрттүн тутанышына дрон сыныгы себеп болгон.
Ал Подгоренский районунун үч калктуу конушунун ондогон тургундары эвакуацияланып, убактылуу баш калкалоо жайларына жайгаштырылганын билдирди.
"Подгоренский районундагы өзгөчө кырдаалдын кесепетин жоюуну улантуудабыз. Азырынча убактылуу баш калкалоочу жайларга 50дөй кишини көчүрдүк. Аларга тиешелүү жардам көрсөтүп жатабыз",-деп Гусев Телеграм-каналына жазды.
Расмий эмес маалыматтарга караганда, украин дрондорунун чабулуна Сергеевка кыштагына жакын жердеги курал-жабдык кампасы дуушар болгон. Ал Воронежден 140 чакырым алыстыкта жайгашкан. Украин маалымат каражаттары жазгандай, дал ушул кампадан орус аскерлери ракета, снаряд жана башка ок-дарылар менен камсыздалып турган. Расмий Киев адатта Орусиянын аймагында болгон окуяларга комментарий бербейт.
Ал арада украин армиясы 7-июлда орус күчтөрүнүн кезектеги аба чабуулдарынын мизин кайтарганын билдирди.
6-июлга караган түнү Украинанын 12 облусуна ракеталык чабуул жасалды. Жалпы сокку урган 27 ракетанын 24ү атып түшүрүлгөнүн украин Куралдуу күчтөрү билдирди.
"Шахед" сыяктуу дрондор Винницки, Днепропетровск, Донецк, Запорожье, Киев, Кировоград, Николаев, Полтава, Сумы, Харьков, Херсон жана Чернигов облустарынын үстүнөн атып түшүрүлдү. Орусиялык күчтөр коңшу өлкөнү түндө 27 ракета менен аткылаган.
Соккудан улам Сумыда бир катар райондор электр жарыгысыз калып, жети сааттай суу чыкпай калган. Калыбына келтирүү иштери уланууда.
Днепропетровск облусунда инфраструктура, турак жай, дүкөн жана автоунаа жабыркаган.
Калган облустардан аткылоонун кесепети тууралуу маалымат берилген жок.
Орусия тарап чабуул тууралуу комментарий бере элек.
Ал арада Орусиянын Краснодар крайында дрон чабуулунан эки мунай базасы өрттөндү, мобилдик байланыш мунарасы жабыркады. Бул тууралуу аймактын ыкчам штабы маалымдап, чабуул үчүн Украинаны айыптады.
Маалыматка караганда, эки райондун үстүнөн дрондор атып түшүрүлгөн. Биринин сыныгы мобилдик байланыш мунарасын жабыркаткан. Павлов районунда жана Ленинград станциясында эки мунай базасындагы күйүүчү май резервуары өрттөнүп кеткен.
Орусиянын Коргоо министрлиги 6-июлга караган түндө Курск облусунун үстүнөн жети, Белгороддо бир дрон атып түшүрүлгөнүн маалымдады.
Украин аскерлери Донецк облусундагы Часов Яр шаарынын «Канал» деп аталган кичи районунан чыгып кетишкенин 4-июлда өлкөнүн Куралдуу күчтөрүнүн басма сөз кызматы тастыктады.
«Хортица» ыкчам-стратегиялык аскер тобунун өкүлү Назар Волошин ал жакта туруу зарылчылыгы калбаганын, себеби украин аскерлеринин өмүрүнө коркунуч жаратуучу кырдаал түзүлгөнүн, алардын турумдары талкаланганын айтты.
«Командачылык жакшыраак корголгон, даярдалган турумдарга чегинүү чечимин кабыл алды. Бирок душман ал жакта да активдүү чабуулдарын улантууда. Алардын ошол тилкеде бир нече айдан бери аткара албай жаткан максаттары бар чыгар», – деди ал.
3-июлга караган түнү DeepState долбоору Орусия Часов Ярдагы «Канал» кичи районун басып алууга жетишкенин жазган. “Новый” деп да аталган бул район менен шаардын негизги бөлүгүнүн ортосунда “Северский Донец — Донбасс" каналы бар. Азыркы кезде украин аскерлери ошол жерден коргонууда.
Бул кичи район үчүн салгылаш быйыл апрель айында, Орусия Бахмуттун батышы аркылуу алдыга жылганда башталган.
Улуу Британиянын чалгын мекемеси Часов Яр дөбө жерде жайгашкандыктан Орусия үчүн стратегиялык жактан маанилүү экенин, ал эми Украина үчүн Куралдуу күчтөрүнүн логистикалык түйүнү болгондуктан мааниси чоң экенин жакында жазган.
Орусия Украинага кол салганга чейин Часов Ярдын калкы 10 миң адам болчу. Азыр аны орус армиясы тыптыйпыл кылганы кабарланууда. Орус аскерлери он чакырым аралыкта жайгашкан Бахмут калаасын ээлеп алгандан кийин бул шаар фронт тилкесине айланган.