Украина Херсон облусунда соңку суткада Орусиянын чабуулдарынан бир киши каза болгонун, 16 киши жараат алганын, алардын арасында эки бала бар экенин билдирди. Облустун аскердик администрациясынын башчысы Александр Прокудиндин айтымында, жалпысынан орус аскерлери 25 калктуу пунктту бутага алды.
Облус аймагында жеке үйлөр, кабат үйлөр, дүкөн, газу кууру талкаланганы маалымдалды.
Украинанын Аба күчтөрүнүн маалыматына караганда, Орусия 27-июнга караган түнү 29 ракета жана дрон учурду, алардын арасынан «Кинжал» ракетасынан башкасынын баары атып түшүрүлдү.
Фронтто Краматорск багытында орус армиясы Временный Яр тарапта чабуулдарын улантып жатканы, Торецк багытындагы абал чыңалып турганы, Харьков багытында Волчанск үчүн күрөш уланып келатканы маалымдалды
Орусия эмгек мигранттарын өлкөдөн кетириш үчүн аларды Украинадагы согушка жөнөтүп жатат. Бул тууралуу 27-июнда Петербург эл аралык юридика форумунда сүйлөп жатып Орусиянын Тергөө комитетинин төрагасы Александр Бастрыкин билдирди.
«Биз мигранттар Орусиядан акырындап кете башташына алып келе турган бир амал таптык. Конституциянын жана мыйзамдарыбыздын жарандык алган адамдар аскердик каттоого турууга, керек болсо атайын аскердик операцияга катышууга милдеттүү деген жоболорун ишке ашыра баштадык»,— деди Бастрыкин.
Ал жакында орус жарандыгын алган, бирок аскердик каттоого турбай жүргөн 30 миңдей чет өлкөлүк аныкталып, каттоого алынганын, алардын 10 миңге жакыны согушка жөнөтүлгөнүн айтты. Мигранттар «окоп казганга» да керек экенин айткан жетекчи «алар бүгүнкү күндө биздин тылдагы бөлүктөрдү толуктап жатышат» деп кошумчалады.
2022-жылдын февралында Орусия Украинага кол салгандан тартып орус бийлиги бул өлкөгө жумуш издеп барган борборазиялык мигранттарды согуш талаасына жөнөтүп жатканы кабарланып келет.
Тергөө комитетин 2011-жылдан бери башкарып келе жаткан Бастрыкин мигранттарга каршы мамилеси менен белгилүү. Ал миграция мыйзамдарын катуулатуу керек деп эсептейт. Быйыл жазында Москвада «Крокус Сити» борборунда кеминде 145 кишинин өмүрүн алганы айтылган кол салуудан кийин да ал мигранттарга каршы билдирүүлөрдү жасаган.
Расмий Бишкек Орусиянын Украинага каршы согушу боюнча бейтарап позицияда экенин кайталап келет.
Орусияда мигранттарды согушка тартуу күчөп, алтургай абактардан алып кетип жатканы белгилүү. "Азаттык" "Вагнер" жалданма тобунун катарында Украинадагы согушка барып, окко учкан кеминде ондон ашуун кыргызстандыкты тактаган.
Украина жана Орусия ар бири 90дон согуш туткунун айырбаштады. 25-июндун кечинде Украина Улуттук гвардиясынын жоокерлерин, аскер кызматкерлерин жана чек арачыларын, жалпы 90 кишисин Орусиядан кайтарып алганын өлкө президенти Владимир Зеленский билдирди. Бул жолку туткун айырбаштоого да Бириккен Араб Эмирликтери (БАЭ) ортомчу болуп беришти.
Украинанын координациялык штабынын маалыматына караганда, мекенине кайткан жоокерлер арасында Мариуполду коргоого катышкан 59 адам бар, алардын 52си "Азовсталь" ишканасын коргоп жатып туткунга түшкөн.
Орусиянын Коргоо министрлигинин маалыматында туткундан кайткандар дарылоого жана реабилитацияга жөнөтүлөрү гана айтылды, алар кимдер экени кабарланган жок.
Буга чейин эки өлкө ортосунда БАЭнин ортомчулугу менен туткун айырбаштоо 31-майда болгон. Анда Украинанын 75, Орусиянын да 75 жараны бошотулган. Ошол эле күнү Украина каза болгон 212 жоокеринин, Орусия 45 аскер кызматкеринин сөөгүн өткөрүп алган.
Бириккен Улуттар Уюмунун (БУУ) Адам укуктары боюнча жогорку комиссариаты орус аскерлери 2023-жылдын декабрынан 2024-жылдын февралына чейинки аралыкта эле туткундагы украин жоокерлеринин кеминде 32син өлтүргөнүн билдирген. БУУнун эксперттеринин сурамжылоосуна катышкан 44 орусиялык согуш туткуну Украинанын абагында кандайдыр бир ырайымсыз мамилеге кабылганы тууралуу айтышкан эмес, колго түшкөн учурда же абакка жеткирилип баратканда гана кыйноого кабылганын билдиришкен.
Украина орус аскерлеринин кылмыштары, анын арасында туткундагы украиндерди өлтүргөнү тууралуу 50 миңден ашуун кылмыш иши тергелип жатканын билдирген. Орус тарап бул боюнча комментарий берген эмес.
Согуш туткунун өлтүрүү эл аралык укук тажрыйбасында согуш кылмышы катары бааланат.
Орусия Украина менен чектеш тилкесиндеги айрым аймактары дрон чабуулуна кабылганын билдирүүдө. 25-июнда Воронеж, Белгород жана Курск облустары бутага алынганын жергиликтүү бийлик өкүлдөрү маалымдап, Украинаны айыпташты.
Воронеж облусунун башчысы Александр Гусевдин айтымында, Ольховатский районунда өзгөчө кырдаал жарыяланды, район аймагына кирип-чыгууга убактылуу чектөө киргизилди, ал жерде «жарылуучу объектилер детонация болду», адамдар арасында жабыркагандар жок. Түндө Гусев облус аймагында украин аскерлери учурган эки дрон токтотулганын жазган.
Украинанын Коргоо министрлигинин Башкы чалгын башкармалыгы орус армиясынын «курал-жарак сакталуучу көчмө курамы» жок кылынганын маалымдады. Мекеме «Түндө снаряд сакталуучу жалпы аянты 3500 чарчы метрлик жерде детонация болуп, өрт чыкты» деп кабарлады.
Белгород облусунда бир аял каза болгонун, ал жашаган үй кыйраганын аймактын башчысы Вячеслав Гладков билдирди. Түндө ал облус аймагы дрон чабуулуна кабылып жатканын, бир нече киши жараат алганын, көп кабат үйлөр, бир автосалон, дүкөндөр жана машиналар талкаланганын жазган.
Орусиянын Коргоо министрлиги жалпысынан өткөн түнү 30 согуштук дронду токтотуп калышканын маалымдады.
Курск облусунун губернатору Алексей Смирнов Суджа шаары аткыланып, натыйжада бир аял жараат алганын билдирди. Облус башчысынын айтымында, дагы бир жергиликтүү тургун жүрөгү кармап, ооруканага жеткирилди, үч үйдө өрт чыкты.
Орусиянын Украина менен чектеш аймактары Москва 2022-жылы толук масштабдуу согуш ачкандан кийин түрдүү соккуларга кабыла баштады, мындай чабуулдар соңку кезде көбөйүүдө. Украина президенти Владимир Зеленский 22-июндун кечиндеги теле кайрылуусунда Батыштагы өнөктөштөргө Украинанын абадан коргонуу системасын бекемдөөгө көмөктөшүү өтүнүчүн дагы бир жолу кайталап, Орусиянын согуштук учактарын «кайсыл жактан учурулуп жатса, ошол жерден жок кылууга» мүмкүнчүлүк берүүгө чакырган.