Этно-маданий фестивалды уюштуруу идеясын Бириккен Араб Эмираттары көтөрүп чыгып, алгач аталган өлкөдө жашаган жети эмирликтин жарандарын бириктирүү максатын көздөгөн.
Кийинчерээк фестиваль башка өлкөлөргө да кулач жайды. Быйыл катышуучу өлкөлөрдүн саны 24төн ашканын уюштуруучулар кабарлашты.
Бириккен Араб Эмираттарынын бийлиги аталган фестиваль үчүн атайын шаарча курган. Ал Көчмөндөр оюндары учурундагы Кырчын жайлоосунда уюшулган этношаарчага түспөлдөш.
Айырмасы жети жыл катары менен фестиваль өткөн шаар чөлдүн так ортосунда жайгашкан.
Этно шаарча жарым кылым мурдагы оазистин элесин берип, калаа ичи соодасы кызыган базарга окшош.
“Мурас” деп аталган фестиваль жыл сайын декабрь жана январь айларында өтөт. Мында байыркы замандагы ар улуттун жашоосу, каада-салты, маданияты, улуттук бийлери театралдаштырылып көрсөтүлөт.
Этно базарда жергиликтүү кол өнөрчүлөр жасаган буюмдардан сырткары Индия, Кытай, Ооганстан, Түштүк жана Батыш Африкадан келген баалуу буюмдарды тапса болот. Борбор Азиядан Кыргызстандан башка бардык кошуна өлкөлөр катышкан.
Этно фестиваль 60 күнгө созулуп, анын алкагында 1,5 миңден ашуун көргөзмө, маданий-музыкалык программалар, кол өнөрчүлүк жармаңкелери, улуттук мода көргөзмөлөрү, тамак-аш фестивалдары көрүүчүлөргө тартууланат.
Өзбекстандан келген топ өзүнүн улуттук тамактарынан сырткары өзбек нанын көргөзмөгө койгон. Былтыр өзбекстандык ашпозчулар миң киши үчүн палоо баскан.
Фестивалда араб элдеринин көргөзмөлөрү басымдуулук кылат. Алар, 20- кылымдын ортосуна чейинки Арабия жарым аралдарында жашаган жергиликтүү тургундардын жашоосун чагылдырып берүүгө басым жасашкан.
Фестиваль араб маданиятын дүйнөгө таанытууга шарт түзгөнүн уюштуруучу топтун мүчөсүнүн бири Мохамед Елсегини белгилеп өттү.
- Жыл сайын катышуучу өлкөлөрдүн саны көбөйүп жатат. Биздин башкы максат - фестиваль аркылуу туристерди тартуу. Андан сырткары Бириккен Араб Эмираттарында 200гө жакын улуттун өкүлдөрү жашайт. Алардын да маданиятын, каада-салтын жайылтуу, аны менен катар ынтымакты, достукту бекемдөө. Фестивалдын мындан ары да өнүгүшүнө бар аракетибизди жумшайбыз, - деди Мохамед Елсегин.
Илгери Арабияда суусу жок, шарты катаал чөлдө жашоо өтө оор болгон. Орточо эсеп менен мырзалар 25-30 жыл гана өмүр сүрсө, аялдар 35-40 жашка чейин гана жашаганы айтылып келет.
Перс булуңунда жайгашкан өлкөлөрдүн жергиликтүү тургундары балык уулап, суу астынан бермет чогултуу менен күн кечиришкен.
Мырзалар балык кармоочу тордон тартып, кеме, кайык, калактарына чейин өздөрү жасашкан. Азыр деле балык улоо деңизге жакын жайгашкан жергиликтүү эл үчүн көнүмүш адат.
Акыркы тапта кол өнөрчүлүк унутта калып бара жатканынан улам, Эмираттардын бийлиги өз маданиятын, каада-салтын сактап, келечек муунга өткөрүү максатында түрдүү иш-чараларды уюштуруп келет.
Араб көл өнөрчүлүгүнүн калыптанышында аялдардын орду чоң экенин уюштуруучулар белгилешет. Аялдар ийик ийрип, таар-килем согуп, үй турмушуна керектүү буюмдарды өздөрү жасап, айрым учурда аны сатып пайда табышкан.
Араб айымдары жасаган буюмдарынын арасынан кыргыздын оймо-чиймелерине окшош жасалгаларды да көрүүгө болот.
Фестиваль 60 күнгө созулуп, күн сайын ар бир өлкө өзүнүн улуттук бийин, ыр-күүсүн көрүүчүлөргө тартуулады.
Уюштуруучулардын айтымында, былтыр фестивалды көрүү үчүн жергиликтүү тургундардан сырткары 1,5 миллиондон ашуун турист келген.
