Ал арада түрк аткаминерлери Эрдогандын Стамбулга келгендигин айтышууда. ТРТ каналы Эрдогандын билдирүүсүн берип аткан учурда анын Стамбулда экендигин жазышты. Reuters маалымдагандай, Ататүрк аэропортунда жардыруу болду. AP агенттиги болсо Стамбулдун борборунда эки жардыруу болгондугун кабарлады. "Азаттыктын" кабарчысы Стамбулдагы жардырууларды мейманканасынын ичинде жатып угуп, сезгендигин жана жардыруулар катуу болгондугун ырастады.
Түркия президенти Режеп Тайып Эрдоган Стамбулдагы Ататүрк аэропортуна барып, чогулган эл менен жолугушканын жергиликтүү телеканалдар көрсөттү.
Акыркы сааттарда Ататүрк аэропортунда Эрдоганды колдогон миңдеген адамдар төңкөрүш жасоого аракет кылган аскердик унаалардын жолуп тосуп чыгышкан. Эрдоган Түркияда элдин бийлигинен жогорку бийлик жок, төңкөрүш жасоого аракеттенгендер кайсыл мамлекеттик уюмдан болбосун, өз жазасын алат деп сөз сүйлөдү.
Аскердик төнкөрүш жасоого аракет кылган түрк генералынын бири өлтүрүлдү. Бул тууралуу Түркиянын премьер-министри Бинали Йылдырым билдирди.
Анын айтымында, толкундоо басылып, көтөрүлүштүн айрым гана очоктору калды.