Токиодо өтүп жаткан жайкы Олимпиада оюндарында 6-августта эркин күрөштөн 65 килограмм салмакта мелдешке катыша турган кыргызстандык Эрназар Акматалиевдин алгачкы атаандашы белгилүү болду.
Ал 1/8 финалда индиялык Бажраң Пуниа менен беттешет. Бул салмакта жалпысынан 16 балбан күч сынашат.
Бажраң Пуниа 27 жашта. Дүйнө чемпионатынын үч жолку байге ээси (бир күмүш, эки коло), Азиянын эки жолку чемпиону, үч жолку күмүш, эки жолку коло байгесинин ээси. Азия оюндарынын күмүш жана коло байгесин уткан.
Эрназар Акматалиев 23 жашта. Токио Олимпиадасына жолдомону быйыл апрелде Казакстандын Алматы шаарында өткөн Азиялык квалификациялык мелдеште алган. Ал 65 килограмм салмакта мелдештин жарым финалында 2020-жылдагы Азия чемпиону (70 кг), өзбекстандык Ильяс Бебулатовго 0:8 эсебинде жеңилип келе жатып, атаандашынын далысын килемге басып финалга чыккан.
Эркин күрөш боюнча Азиялык квалификациялык мелдеш. 65 кг. жарым финал. Э.Акматалиев - И.Бекбулатов 4:8. 11-апрель, 2021-ж.
Алтын байге үчүн беттеште ирандык Амир Мохаммад Язданини 15:13 эсебинде жеңип, алтын медал тагынган.
Бул жылы Акматалиев Украинада өткөн эл аралык мелдеште да күмүш байге алды. 2019-жылы Иранда өткөн Тахти кубогунун жеңүүчүсү. 2018-жылдагы жаштар арасындагы Азия чемпионатынын күмүш байгесинин ээси. 2015-жылы уландар (кадеттер) арасындагы Азия чемпионатынын коло байгесин алган. (ECh)
Токиодогу Олимп оюндарында Казакстандын мушкерлер курама командасы алтынсыз калышты. 5-августта мушкер Сакен Бибосынов 52 килограмм салмакта жарым финалда британиялык спортчуга 2:3 эсебинде утулуп калды.
Чейрек кылымдан бери алгачкы ирет казак мушкерлери финалга жетпей калышты. Курама команда 1996-жылдан бери мекенине алтынсыз кайта элек болчу.
Бул жолу Сакен Бибосынов менен Камшыбек Кункабаев коло медалга ээ болушту. Казакстандык күйөрмандар Рио-де-Жанейродо күмүш тагынган Василий Левитке жана 2019-жылкы дүйнө чемпиону Бекзат Нурдаулетовго үмүт артып турушкан.
Учурда Казакстандын улуттук курама командасынын капчыгында беш коло медаль бар. Мушкерлерден башка дзюдочу Елдос Сметов, оор атлетчилер Зульфия Чиншанло менен Игорь Сон коло алышкан.
Борбор Азия мамлекеттеринен эки алтын, бир коло медаль менен Өзбекстан алдыда. Андан кийинки орунда эки күмүш, бир коло менен Кыргызстан турат. Казакстан үчүнчү, ал эми Түркмөнстан эгемен тарыхындагы алгачкы күмүш менен төртүнчүдө. Тажикстан бул жолку Олимп оюндарында бир да медаль алган жок.
Биргелешкен күрөш дүйнөсү уюму (UWW) кыргызстандык спортчулар Айсулуу Тыныбекованы жана Мээрим Жуманазарованы “Тарых жаратуучулар” деп атады.
Тыныбекова тууралуу уюм “Кыз-келиндер арасында күрөш боюнча Кыргызстан үчүн алгачкы күмүш медаль утуп, тарых жаратты” деп, Жуманазарова жөнүндө “Коло байге утуп, Олимпиадада медаль тагынган алгачкы кыргызстандык кыз болуп тарых жаратты” деп жазды.
Токиодогу Жайкы Олимп оюндарында эркин күрөш боюнча кыргыз балбаны Айаал Лазарев биринчи беттеште утулду.
Ал 5-августта 125 кг салмакта америкалык Дэн Гейбл Стивенсон менен күрөшүп 10:0 эсебинде мөөнөтүнөн жеңилип, чейрек финалга чыкпай калды.
Теги якутиялык Лазарев - 35 жашта, ал он жылдай убакыттан бери эл аралык мелдештерде Кыргызстандын намысын коргоп келатат.