Мамлекет башчы Садыр Жапаров президент жана өкмөттүн аппараты тарабынан бир топ мыйзамдарды өзгөртүү үчүн мыйзам долбоорлору даярдалганын билдирди.
Ал бул тууралуу жергиликтүү кеңешке шайлоо жана Баш мыйзам боюнча референдумга добуш бергенден кийин, “Азаттык” радиосунун суроосуна жооп берип жатып айтты.
Жапаров учурда бири-бирине каршы келген мыйзамдар көп экенин белгилеп, референдумда Конституциянын жаңы долбоору кабыл алынса, бир топ мыйзамдарга өзгөртүүлөр киргизиле турганын айтты.
“Акыркы отуз жылда кимдер гана мыйзам жазган жок. Түшүнгөндөр да, түшүнбөгөндөр да жазды. Тапшырма бергенбиз, азыр мыйзам долбоолору иштелип чыгып даяр турат. Бүгүн эл жаңы Баш мыйзамды колдоп берип, болжол менен 20-апрелде расмий жыйынтыгы чыкса, бардык долбоорду Жогорку Кеңешке киргизебиз. Жогорку Кеңеш эс алууга кеткенге чейин кабыл алып бериши керек”, - деди президент.
Садыр Жапаров Чоң-Арыктагы №1053 шайлоо участкасында добуш берди.
Борбордук шайлоо комиссиясынын маалыматы боюнча, бүгүн референдумду жана жергиликтүү кеңештерге шайлоону 183 эл аралык байкоочу көзөмөлдөп, 200дөн ашуун медиа каражаты чагылдырууда.
Шайлоо процессин 11 коомдук уюм көзөмөлдөп, дүйнөнүн 25 өлкөсүнөн 179 журналист каттоодон өткөн.
11-апрелде 448 кеңештин, анын ичинде 28 шаардык жана 420 айылдык кеңештин депутаттарын шайлоо болууда.
Ушул эле күнү президенттик башкарууга ыктаган Баш мыйзамдын жаңы долбоору референдумга коюлуп жатат.
Президент Садыр Жапаров Чоң-Арыктагы №1053 шайлоо участкасында добуш берди.
Ал жергиликтүү кеңешке шайлоо жана Баш мыйзам боюнча референдумга добуш берип жатып, кыргызстандыктарды референдумга активдүү катышууга чакырды.
“Отуз жыл аралыгында Конституцияга көп жолу өзгөртүүлөр киргизилди. Бирок кайсы бир мамлекеттен же кайсы бир булактардан Конституциянын долбоорун көчүрүп жазып алып, ошону менен жашап келдик. Биринчи жолу Конституциянын долбоорун аксакалдар, академик, юридикалык докторлор болуп жүзгө жакын адамдын катышуусу менен өзүбүз иштеп чыгып, түз эфирде элдин талкуусу менен ачык даярдап чыккан Баш мыйзамды кабыл алуу алдында турабыз”, - деди президент.
