Кыргызстанда азыр азык-түлүк коопсуздугуна коркунуч бар. Бул тууралуу 17-июнда парламентте депутаттардын суроолоруна жооп берип жатып Министрлер кабинетинин төрагасы Улукбек Марипов билдирди.
Ал азык-түлүктүн көбү сырттан импорттолорун белгилеп, алдын алуу иштери жүрүп жатканын айтты:
“Коркунуч бар. Муну биз жашырбай айтып жатабыз. 750 миң тонна ун камсыздасак, ошонун дээрлик 50% биз импорт менен алабыз. 105 миң тонна кант керектесек, анын 50 миң тоннадайын өзүбүз өндүрөбүз, калганын импорт алабыз. Өсүмдүк майын 85% импортко алабыз. Быйыл кант кызылча аянтын көбөйттүк эле, тилекке каршы, бул маселе эми аягына чыкпайт. Бирок биздин максат – комплекстүү чечимдерди кабыл алуу. Жашыл экономика аркылуу көп инвесторлорду азык-түлүк коопсуздук маселесине бурушубуз керек. Кышка карата азык-түлүк топтоп жатабыз”.
Кыргызстанда азык-түлүк, кара май жана башка продукция улам кымбаттоодо. Чүйдө сугат суу жетишпей, дыйкандар эмгеги текке кеткенин айтып жатышат.
Парламентте бүгүн Министрлер кабинетинин төрагасына ишеним көрсөтпөө демилгеси көтөрүлдү. Марипов кызматтан кетүүгө даяр экенин, бирок андан маселе чечилбей турганын билдирди.
Кыргызстандагы Чүй дарыясы куйган Орто-Токой суу сактагычындагы суунун 15% Казакстанга агып жатат. Бул тууралуу айыл, токой жана суу чарба министри Аскарбек Жаныбеков бүгүн, 17-июнда Жогорку Кеңеште депутаттардын суроолоруна жооп берип жатып билдирди. Анын айтымында, анда жалпысынан 4700 миллион куб метр суу бар. "1983-жылдагы келишимдеги тартипке ылайык, кыргыз тарап Казакстанга суунун 42% бериши керек. Бирок ушул тушта Казакстан суунун 15% гана алып жатат”, - деди министр.
Ушул күндөрү Чүй облусунун үч районунун дыйкандары айдоо талаалары суу жетпей күйүп баратканын айтып, митингге чыгууда. Өкмөт болсо суу жылдагыдан аз келип жатканын айтып жатат. Мындай жагдайдан улам дыйкандардын эгин-тегини күйүп, азык-түлүк коопсуздугуна коркунуч жаралышы мүмкүн деп эскерткендер да бар.
Жогорку Кеңештин жыйыны (түз эфир)
Жыйын учурда депутаттар кер-мур айтышканга чейин барды