Ага чейин социалдык тармактарда жана парламентте курулушу 2017-жылы эле бүткөн бул жай эмнеге жабык турганын сурап чыккандар көбөйгөн. Жаңы оорукана эмнеге ачылбай турду? Аны башкарууга Кыргызстанда татыктуу адистер жокпу?
Түркия элчилиги 2017-жылы 25-мартта салынып бүтүп, бирок башкаруу боюнча эки тараптуу келишим ратификация болбогондуктан ачылбай турган Бишкектеги кыргыз-түрк ооруканасы кыргыз өкмөтүнө берилгенин билдирген. Мындай чечим COVID-19 оорусуна каршы күрөшүү максатында кабыл алынганы айтылган. 3-апрелде саламаттык сактоо министри Сабиржан Абдикаримов жакынкы күндөрү бул оорукана ачыларын билдирди:
«Штатын, акча каражатын жана башкаруусун чечип, даярдап турушубуз керек. Эгер көп киши түшө баштаса ошол оорукананы тез арада колдонгонго киришүүбүз керек. Бир-эки күндө чечилет».
«Оор дарттарды дарыласа болот»
Оорукананын ички мүмкүнчүлүктөрүн активист Гүлмира Абдразакова онкологиялык ооруларды жана орган алмаштырууда кеңири колдонсо болмок деген ойдо. Ошол эле маалда COVID-19 менен күрөшүүдө ооруканадагы заманбап жабдууларды пайдаланууга мүмкүн деген пикирин айтты:
«Азыр күчөп жаткан коронавируска чалдыккан эң оор абалдагы бейтаптарды ошол жакка жиберсе болот. Өпкөнү жасалма дем алдыруучу жабдуулар бизде жетишсиз эмеспи. Ошол аппараттар жаңы ооруканада бар экен. Коронавирус менен күрөшүүдө реанимациялык оорукана кылып колдонсок болот. Бирок анын статусун, багытын аныктоо азыр аябай кыйын болуп жатпайбы».
«Байлар гана дарыланабы?»
Оорукананын ачылбай турганын парламентте сөз болуп, депутат Элвира Сурабалдиева бул маселени козгогон. Бирок депутат Сурабалдиева эки тараптуу келишимде «бул ооруканада жалаң колунда бар адамдар гана дарыланат» деген пункттан улам парламенттин сынына кабылып, ооруканада иштөөгө түрк, англис тилин билген дарыгерлерге конкурс жарыяланганы менен эшигин кара кулпу кайтарганын белгилейт. Ал ооруканага байланыштуу келишимде көмүскө сыр бардай деген оюн айтты:
«Бул оорукана эми бизге кандай шарттарда берилди? Жөн эле бере салыштыбы? Ушул маселе да түпөйүл кылбай койбойт. Жанагы «Газпром» салган мектеп бар го, алгач «мэрияга бекер беребиз» деп, анан акы төлөгөн окуу жайына айланып калбадыбы. Ошол сыяктуу бул ооруканага байланышкан келишимде да биз билбеген көмүскө жагдайлар бардай болуп жатат. Анын баарын изилдеп чыгыш керек».
Атайын билимдүү адистер керек
Алты кабаттуу имараттын ички башкаруу системасы толугу менен электрондошкон. Саламаттык сактоо министрлигинин коомдук кеңешинин мурдагы төрайымы Нурхан Жумабаева түрктөр берген белекти эми кыргыз тарап татыктуу иштете аларынан күмөн санап, бул үчүн сөзсүз атайын билими бар адистер керек деп жаткан учуру:
«Азыр бизде иштеп жаткан ар бир оорукананын багыты бар. Жугуштуу оорулардын ооруканасы болобу же хирургиябы, айтор жаңы жайдын багыты кандай болушу керек деген суроого биринчи жооп табышыбыз керек. Биринчи ушул маселени чечкенден кийин гана ал оорукананын деңгээлине шайкеш келген башкаруучуну коюш керек. Бул үчүн биринчи кезекте түркиялык менежерлерден башкаруу системасын үйрөнүп алганыбыз дурус».
Эки тараптуу келишимдеги негизги шарттар, оорукананын ичиндеги жабдуулардын тизмеси, бейтаптарды дарылай турган багыты боюнча азырынча так маалыматтар бериле элек.
«Дипломатиялык жолду тандагыла»
Бирок Түркиянын Саламаттык сактоо министрлигинде бир топ жыл иштеп, азыр ардактуу эс алууда жүргөн Севал Дүндар дипломатиялык жол менен Түркиянын Саламаттык сактоо министрлигинен адистерди убактылуу ишке тартып, бул оорукананы кыргыз элинин пайдасына иштетүүнү сунуш кылды:
«Бишкектеги «Кыргыз-түрк достугу» ооруканасы курулуп бүткөндө эле ачылышы керек эле да. Бирок бюрократиялык ар түрдүү себептерден улам тилекке каршы ачылбай турду. Эми мындан ары да аны иштетүү жаатында эки тараптуу макулдашуулар керек. Дипломатиялык жол менен маселени чечсе болот».
Бишкекте Түркия куруп берген ооруканада 21 реанимациялык орун, жасалма дем алдыруучу 22 атайын аппарат бар. Бул тууралуу 27-мартта Түркиянын Кыргызстандагы элчилиги кабарлады. Элчилик билдиргендей, мындан тышкары эки операция залы, бейтап жатып дарыланчу 51 орун бар.
Эскертүү!
«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
