Дастан Бекешев: Бул зыянкечтик. Мамлекет жарандарына ансыз да эч нерсе бере алган жок. Эми жалгыз сөз эркиндигин тартып алганы жатат. Эң жалган маалыматты саясатчылар таратат. Айлык көтөрүлдү дейт, көтөрүлгөн жок. Кайра кыскарып жатат.
Жыйын учурунда мыйзам долбоорунун автору Гүлшат Асылбаева менен депутат Дастан Бекешовдун ортосунда кайым айтышуу чыкты.
Гүлшат Асылбаева: Дастан Далабаевич сиздин юридикалык компетенттүүлүгүңүздөн шек санап жатам.
Дастан Бекешев: Менин компетенттүү экенимди окутуучуларым айтсын. Сиз бул мыйзам менен "Биримдик" партиясынын тизмесине киргениңизди жакшы билебиз.
Жогорку Кеңештин депутаты Шайлообек Атазов бул мыйзам алымча-кошучалар менен кабыл алынышы керек деп эсептейт.
“Эркек болсо, таза болсо өзүнүн сүрөтүн коюп пикир жазса сөз жок. Бирок бир эле саясатчы миңдеген фейктер менен бирөөлөрдүн абийирин төгүп жаздырган мыйзамсыз, анан күнөө. Фейк деген аты жок, бирөөлөрдү ушактагандар деп аныктама берип койсом болот. Мыйзамда эч кимдин укугун бузган жок. Фейк кылмыш кылып жатат, бирөөнүн үй-бүлөсүн бузуп, кадыр-баркын бузуп жатат. Ачык чыгып жазсын сөз жок”.
Колуна “Гүлшат Асылбаева, Садыр аваман колуңду тарт!” деген кагаз көтөргөн жарандык активист Улан Үсөйүн мындай деди.
“Элдин пикирин бийликке жеткире турган сайттар, эркин журналисттер гана калды. Эми ошону чектегенге аракет кылып жатат. Эркин сайттардын, адамдардын, ойдун болгону бийликке жакпайт. Социалдык тармак аркылуу эл көп нерсени айтып, бийликтеги адамдардын жүзүн ачып жатат. Биз былтыр эле бүттү деп ойлогонбуз, бирок кайрадан алып чыгыптыр. Мен Садыр Жапаров жакшы ойлонуп, туура чечим чыгарат деп ойлойм”.
Элери Битикчи: Эң биринчиден мыйзамды кабыл алганда регламенттин бардыгы бузулган. Жогорку Кеңештин мөөнөтү да өтүп кетти. Жөн эле отурушса болмок. Бул мыйзам оозду жаптырыш үчүн жазылган. Көзөмөл кылганга акча дагы, ресурс дагы жок. Менин оюмча репрессияга жол ачкан, саясий мыйзам болуп жатат. Бийликти сындагандар үчүн гана колдонулат деп ойлойм.