Митингде Мурдагы президент Алмазбек Атамбаев камалсын, УКМКнын мурдагы жетекчиси Абдил Сегизбаев камалсын, мурдагы баш прокурор Индира Жолдубаева камалсын деген талаптар жаңыра баштады.
"Калыстыгын айта албаган президенттен эмнени күтсө болот? Ушул киши шайланып жатканда камалгандарды актап берет деп күткөнбүз. Сооронбай Жээнбеков ойлонсо болмок. Элдин кыжырына тийбесин. Атамбаевдин уяты жок, бүт былыкты баштады. Камалсын Атамбаев!", - деди митингдин катышуучусу Аятхан Абдыкапырова.
Каныбек Иманалиев: Соту акыйкат болбогон өлкөгө инвестор келбейт. Бүгүнкү күндө жети сот камалып жатат. Жети эмес, жетимиш сот камалышы керек. Булар бийликтин, Маевскийдин соту болуп калды. Садыр Жапаровдун ишинде жабырлануучу жок. Каптагаев доом жок деп какшап жатат. Андай болсо Садыр Жапаров эмнеге абакта жатат? Бүгүнкү күндө кыргыз парламентаризминин символу, Баш мыйзамдын атасы Текебаевдин абакта жатканы - бул чындыктын абакта жатканы. Чындык камалган өлкөдө акыйкаттык болбойт. Дүйшөнкул Чотонов жигиттик үчүн түрмөдө жатат. Ал кылбаганды кылды деген жигит эмес. Биз сотторго талапты күчөтүшүбүз керек.