Парламент депутаты Жанар Акаев: "Урматтуу мекендештер, терезеден шыкаалап турган урматтуу эмес соттор! Азыр 99% сотторду жаңылашыбыз керек. Жакында Британияда чыккан "Экономист" деген журнал "Кыргызстан аймактагы эң жакыр өлкөгө айланды. Казакстандын бир жараны тапкан кирешени Кыргызстандын он жараны таппайт" деп жазды. Биздин саясатчылар ичкен коньягын талашып отурат. Саунада жуунасыңбы же үйүңдө тепшиде жуунасаңбы, бизге айырмасы жок. Украинаны карайлы, согушуп аткан, башкалар кол салып жаткан мамлекеттин саясатчылары жогорку маданияттуулугун көргөзүп, 40тын кырынан эми ашкан жигитти шайлап алды. Бизде соттор саясатчыларга иштеп жатат. Соттор силер бийликтен эмес, ушул жерде турган элден коркушуңар керек!".
Алмамбет Шыкмаматов: Текебаев, Жапаров, Чотонов бийликке сын айтканы үчүн, бийликтин өзүмбилемдигин токтоткула дегени үчүн, бийликтеги коррупцияны айтканы үчүн, Кумтөрдөгү маселени ачык айтып, президентти сындаганы үчүн камалып отурат. Биздин бүгүнкү талап сот адилеттигин орнотуу. Президенттен сот реформасын аягына чыгууну талап кылабыз. Индира Жолдубаева, Абдил Сегизбаевге окшогон бийликти кыянаттык менен пайдалангандарга президентке каршы чыккандарды, мамлекеттин кызыкчылыгы үчүн сүйлөгөн адамдарды камаганды токтоткула деп талап кылабыз. Мындан ары бийликке сын айткан үчүн эч ким камалбашы керек. Бийликтин кемчилигин айткан үчүн эч ким жоопко тартылбашы зарыл. Айыл өкмөтүнөн баштап район, облустарга чейин ачык айткан, элдик, демократ адамдар эч качан куугунтукталбашы абзел. Эгерде биз ушул бийликте болуп жаткан көйгөйгө көз жумсак, анда биз соз эркиндигин, демократиябызды өлтүрүп алабыз. Авторитардык системага жол беребиз.