Ал эми "Ак шумкарлардын" катарына буга чейин жараат алганы айтылган алдыңкы чабуулчулардын бири Виталий Люкс да майданга чыгарын башкы машыктыруучу Александр Крестинин айтып өттү. Буга чейин Люкс Өзбекстандын курама командасы менен болгон беттеште жараат алган.
Жапондордун башкы машыктыруучусу Хадзимэ Мориясу Кыргызстан менен боло турган беттешке 23 футболчуну чакырган.
Курама топто Англиянын премьер-лигасындагы «Саутгемптон» командасында ойногон Мая Йосида, Түркиянын «Галатасарайында» ойногон Юто Нагатомо жана быйылкы сезондо мыкты оюн көргөзүп жаткан «Ред Булл Зальцбург» клубунун оюнчусу Такуми Минамино бар. Андан сырткары Жапониянын эн кымбат футболчусу Сёя Накадзима Бишкекте өтө турган оюнда беттешке чыгат.
- автор Гүлжан Турдубаева
Жапониянын футбол боюнча курама командасынын башкы машыктыруучусу Хадзимэ Мориаясу Кыргызстандын курамасы мыкты команда экенин айтты.
- Биз Кыргызстан менен буга чейин беттешкенбиз. Күчтүү команда. Беттеш жакшы болот деп ойлойм. Тажикстан менен ойногондо коргонууда катачылыктар болгон. Мунун баарын карап чыктык. Кандай болгон күндө да чыныгы футболду көрсөткөнгө даярбыз.
Жапониянын курама командасынын машыктыруучулар штабы жана 23 футболчусу Бишкекке 11-ноябрда келген.
- автор Гүлжан Турдубаева
Кыргызстандын футбол боюнча улуттук курама командасынын башкы машыктыруучусу Александр Крестинин Жапония менен боло турган оюнга 23 футболчуну чакырган.
Кечээ журналисттер үчүн өткөн басма сөз жыйынында Александр Крестинин “талуу жери жок команда болбойт” деген пикирди айтып, алдыдагы оюнда атаандаштын кемчилигин пайдаланып калууга аракеттенерин билдирди.
- Жапония акыркы убактарда Азия кубогунда гана ийгиликтүү оюн көрсөтпөстөн, дүйнө чемпионаттарына да дайыма катышып келет. Бир тарабынан бул жерде командалардын квалификациясы түшүнүктүү. Экинчи жагынан алганда телегейи тегиз команда болбойт. Биздин милдет - дал ошол талуу жерди туура пайдаланып калуу жана албетте өзүбүздүн мыкты жагыбызды көрсөтүү. Талуу жер Жапония курамасында бар. Жапония курама командасын терең урматтайбыз. Оюндун эсеби кандай болорун өзүңөр боолгоп аласыңар да.