Ош шаарындагы Он-Адыр конушундагы №5321 шайлоо участкасында электрондук үкөк иштебей, эски үкөк колдонулуп жатат.
Участканын төрайымы Бахтиёрхан Шакирова эртең менен добуш берүү башталгандан тарта электрондук үкөк иштебей калганын, 9:10до эски үкөктү койгонго аргасыз болушканын билдирди. Эки жолу адистер келип, оңдой албай кетишкен. Бүгүн Кыргызстанда президенттик шайлоо өтүп жатат. Соңку эки жылдан бери өлкөдөгү шайлоо жараяндары биометрикалык каттоонун негизинде, электрондук үкөктөр менен өтүүдө.
Ош шаарынын Төлөйкөн кичи районунда жайгашкан №5555 шайлоо участкасында белгисиз кишилер шайлоочулардын тизмесин түзүп, келген-кеткендерди каттап отурат.
Алар колундагы тизме эмне максатта жазылганы боюнча "Азаттык" радиосунун кабарчыларына комментарий берүүдөн баш тартып, кетип калышты.
Айрымдары "домком" экенин айтып, тизме тактоо алардын милдети экенин билдиришти.
Аталган шайлоо участкасында №2 форма аркылуу Өзгөн, Кара-Суу жана Кызыл-Кыядан келген тургундар добуш беришет
Буга чейин алар өздөрү билбей эле добуш берүү дареги ушул жерде болуп калганын айтып "Азаттык" радиосуна даттанышкан эле.
Кыргызстандын АКШдагы элчилигинде жайгашкан шайлоо участкасы Бишкек убактысы боюнча саат 18:00дө ачылат. Ал эми Орусиянын Владивосток шаарындагы шайлоо участогу добуш берүү убактысы аяктаганына байланыштуу жабылды.
Кыргызстандын президентин шайлоого байланыштуу жалпысынан 27 чет өлкөдө 37 шайлоо участкасы ачылган. Ооганстандын борбору Кабулда шайлоочулардын коопсуздугунан улам шайлоо участогу ачылган жок. Бул тууралуу ТИМдин расмий өкүлү Айымкан Кулукеева Республикалык шайлоо штабынын жыйынында билдирди.
Расмий маалыматтар боюнча, чет жактарда жүрүп добуш берүүгө укуктуу кыргызстандыктардын саны 18 580. Алар өздөрү жашаган өлкөдө консулдук каттоого турган жана биометрикалык маалыматтарын тапшырган жарандар.
Саат 17:00гө карата Кыргызстанда шайлоочулардын 40% добуш берди.