Сооронбай Жээнбеков шайлоонун алдын ала жыйынтыгы чыккандан кийинки маалымат жыйынында тарапташтары менен. 15-октябрь, 2017-жыл

Шайлоодо Жээнбеков алдыга чыкты

16-Октябрь, 2017

Кыргызстанда 15-октябрда өткөн президенттик шайлоодогу добуштар саналууда. Борбордук шайлоо комиссиясынын соңку маалыматына караганда, добуш берүүлөргө 1 миллион 690 миңден ашуун шайлоочу келди. Шайлоого катышуу 55, 93 пайызды түздү.

Акыркы алдын ала эсептер боюнча талапкерлердин арасынан КСДП көрсөткөн экс-премьер-министр Сооронбай Жээнбеков алдыда баратат. Ага шайлоого катышкан элдин 917 миңден ашууну добуш берген, бул 54 пайыздан ашык көрсөткүч.

Ал эми шайлоодогу анын башкы атаандашы, парламенттеги “Республика-Ата-Журт” фракциясынын лидери, депутат Өмүрбек Бабанов экинчи орунда. Ал 564 миңден ашуун добуш топтоп, 33 пайыздан ашуун добушка ээ болду.

“Бүтүн Кыргызстан” саясий партиясынын лидери Адахан Мадумаров 108 миңден ашуун же 5 пайыздан ашык шайлоочунун добушу менен үчүнчү орунга чыкты.

«Ак шумкар» партиясынын лидери Темир Сариев 3 пайызга жакын добуш менен төртүнчү орунда турат.

Дагы бир талапкер Таалатбек Масадыков 10 миңден ашуун шайлоочунун добушу менен бешинчи катарда.

Улукбек Кочкоровго берилген добуштар 0, 55% же 8 миңден ашканы Боршайкомдун сайтындагы электрондук эсепте көрсөтүлүп турат.

Азимбек Бекназаровго 0.16%, Арстанбек Абдылдаев 0.12%, Арсланбек Малиев 0.1%, Эрнис Зарлыков 0.09%, Токтайым Үмөталиева 0.09% добуш алса, шайлоочулардын 0.69 пайызы баарына каршы болгон.

Шайлоодо 11 талапкер ат салышты. Биринчи турда жеңип чыгуу үчүн талапкер шайлоого катышкан элдин 50 пайыздан ашыгынын добушун алышы керек.

Ал эми аймактар боюнча алганда Бабанов менен Жээнбеков төмөндөгүдөй добуш алган.

Чүй облусу: Бабанов — 50,92%, Жээнбеков — 37,26%

Талас облусу: Бабанов 85,55%, Жээнбеков — 12,77%,

Ысык-Көл облусу: Жээнбеков — 50,7%, Бабанов — 42,26%,

Нарын облусу: Жээнбеков — 56,05%, Бабанов — 36,84%,

Жалал-Абад облусу: Жээнбеков — 59,35%, Бабанов — 27,83%

Ош облусу: Жээнбеков — 72%, Бабанов — 18,3%,

Ош шаары: Жээнбеков — 72,3%, Бабанов — 18,73%,

Баткен облусу: Жээнбеков — 57,39%, Бабанов — 20,53%.

Шайлоонун жыйынтыгы улам жаңыланууда.

08:38 15.10.2017

БШК: Ар бир жаран өзү үчүн гана добуш бере алат

Борбордук шайлоо комиссиясынын маалыматы боюнча, добуш берүүгө 2004-жылкы жана 2014-жылкы үлгүдөгү паспорту бар жана биометрикалык маалыматтарын тапшырган жарандар кире алат.

Добуш берүүнүн жашыруундугун бузган шайлоочулар кылмыш жоопкерчилигине тартылат.

Добуш берүүгө кызматтык абалынан пайдаланып кийлигишүүгө аракеттенген жарандарга административдик жана кылмыш жоопкерчилиги каралганын айтат БШК.

08:39 15.10.2017

Президенттик шайлоо: добушканалар ачылды

Конституцияга ылайык, саат 8:00дө өлкөдөгү 2375 шайлоо участоктору ачылып, ишин баштады. Мындан тышкары чет өлкөлөрдө 37 добушкана ачылат. Алардын ичинен алтоо Орусияда, Германияда үч, Казакстанда эки, Түркияда эки, Кытайда эки, Бириккен Араб Эмирлигинде экиден шаарда мекендештер добуш бере алат.

Расмий маалыматка ылайык, бул шайлоодо добуш берүүгө укуктуу 3 млн 25 миң 768 жаран бар. Анын 2 млн 908 миң 453ү Кыргызстанда болсо, 18 миң 580и чет жерде.

Борбордук шайлоо комиссиясынын төрайымынын кеңешчиси Гуля Алманбетованын “Азаттыкка” маалымдашынча, добушканалардын бардыгы керектүү жабдыктар менен жабдылган:

- Азыркы учурда БШКнын шайлоого даярдыгы жакшы. Техникалык жана уюштуруу маселелери чечилди. 2375 участок шайлоочулар үчүн даяр. Автоматтык добуш саноочу жабдыктар да даяр. 25-августтан баштап тест өткөрүп, коопсуздук чаралары текшерилди. Жалпы 5370 автоматтык эсептөөчү үкөк жеткирилди. Ар бир добушканада экиден автоматтык эсептөөчү үкөк болот, анын бири күтүүсүз жагдай түзүлгөн учурда резервде турат.

Добуш берүү бүгүн саат 20:00 чейин уланат. Кечки саат сегизде добуш берүү токтотулуп, добушканалар жабылат. Боршайкомдун маалымдашынча, алдын ала жыйынтыктар автоматтык эсептөөчү үкөктөр аркылуу саналат.

Ал эми шайлоонун жыйынтыгы боюнча расмий маалымат кол санактан кийин гана жарыяланат.

08:41 15.10.2017

БШК: Бул шайлоодо техникалык мүчүлүштүк болбойт

Мурдагы шайлоолордо автоматтык эсептөөчү үкөктөрдүн жана башка техникалык жабдуулардын бузулган учурлары катталса, бул жолу андай болбойт турганын Борбордук шайлоо комиссиясы убада кылууда. Шайлоого жооптуу мекеменин төрайымы Нуржан Шайлдабекова бул тууралуу бүгүн эртең менен түз ободо жүргүзгөн маалымат жыйынында билдирди:

- Буга чейинки болгон мүчүлүштүктөр адам факторунун натыйжасында болуп келген. Бул жолу андайга жол бербөө үчүн автоматтык эсептөөчү үкөктөрдүн операторлорун башка тартипте окуттук. Ар кандай мүчүлүштүк болгон учурда тез арада жоюу үчүн атайын техникалык колдоо тобу түзүлдү. Алар автоматтык эсептөөчү үкөк жана шайлоочуну идентификациялоо үчүн жоопкерчиликтүү. Мындан тышкары жергиликтүү адистер да келип, жардам беришет.

Кыргызстанда президенттик шайлоо өтүп жатат.

09:45 15.10.2017

Өмүрбек Бабанов: Мен өзгөрүүлөр үчүн добуш бердим

Талапкер Өмүрбек Бабанов жубайы менен Бишкектеги №70 мектеп гимназияда жайгашкан №1216 шайлоо участогунда добуш берди. Аны менен добушканага уул-кызы да келди. Бабанов добуш бергенден кийин кыска билдирүү жасап, журналисттер менен маектешти. Ал маанайы бүгүнкү күндөй ачык экенин айтып, ар бир адамдын шайлоо укугу бар эркин өлкөдө жашап жатканыма бактылуумун деди:

- Менин талапкерлигим да эл тарабынан каралып жатат. Мен чоң үмүт жана ыраазылык менен элим туура тандоо жүргүзөт деп ишенем. Бүгүнкү күн өлкөнүн тарыхында алтын тамгалар менен жазылат деп ойлойм. Мен өзгөрүүлөр үчүн добуш бердим.

Өмүрбек Бабанов өзүнүн жеңишке жетишээрине ишенип турганын, инаугурация тынч өтөрүн жана өзгөрүүлөр башталарын бекемдеди.

Кыргызстандын мамлекет башчылыгына 11 талапкер ат салышууда.

Дагы жүктөңүз