Президенттик шайлоодо алдын ала эсептер боюнча шайлоочулардын көпчүлүк добушу менен алдыда бараткан КСДПдан талапкер Сооронбай Жээнбеков бүгүн маалымат жыйынында атаандашы Өмүрбек Бабанов боюнча айрым суроолорго жооп берди.
"Азаттык" радиосунун "Бабановду командаңызга чакыргыңыз келбейби" деген соболуна, "андай нерсе оюмда да жок" деди.
Журналисттердин "коррупцияны Бабановдон баштайм дедиңиз эле" деген суроосуна комментарий берүүдөн баш тартып, "аны силерге эмес, өзүнө айтайын, артынан айтканым туура эмес болуп калат" деп жооп кайтарды.
Бүгүнкү шайлоодо катуу атаандаштык негизинен эки талапкердин - Сооронбай Жээнбеков менен Өмүрбек Бабановдун ортосунда жүрдү.
Шайлоонун алдында КТРКда 4-октябрда өткөн президенттик кызматка талапкерлердин теледебатында Өмүрбек Бабанов менен Сооронбай Жээнбеков кайым айтышкан.
Бабанов шайлоону утурлай адам ресурсу кайсы талапкердин кызыкчылыгы үчүн колдонулуп жатканы баарына белгилүү экенин айткан.
Сооронбай Жээнбеков "эгерде мен президент болуп калсам, Өмүрбек иним, коррупция менен күрөштү сенден баштайм" деп билдирген.
Бул тууралуу КСДП президенттик кызматка көрсөткөн талапкер Сооронбай Жээнбеков бүгүн Бишкектеги маалымат жыйында билдирди.
Ал шайлоо таза, акыйкат өткөнүн айтып, аны чагылдырган жалпыга маалымдоо каражаттарына, журналисттерге, атаандаштарына жана башка тиешелүү тараптарга ыраазычылык билдирди:
- Шайлоо демократиялык принципте болду. Катуу атаандаштык күрөш менен таза өттү. Алты жылда абдан көп жетишкендик болду, тынчтык менен туруктуулук орноду. Менин негизги максатым - ошону бекемдөө. Алдыда көп реформалар бар. Ошону аяктап, өлкөнү өнүктүрүү менин милдетим. Мага чоң жоопкерчилик жүктөлдү, аны сезип турам.
Жээнбековдун бул айткандарын анын тарапкерлери кыйкырык-сүрөөн менен коштоп турушту.