Социал-демократтар партиясынан президенттикке талапкер Сооронбай Жээнбековдун шайлоо штабынын башчысы Фарид Ниязов "Өмүрбек Бабанов КСДПны" каржылаган эмес деп айтып чыкты.
"Президент Алмазбек Атамбаевдин шайлоо алдындагы өнөктүгүн Өмүрбек Бабанов каржылаганы тууралуу маалыматым жок. Анткени 2011-жылы мен президенттикке талапкер Алмазбек Атамбаевдин шайлоо штабынын жетекчиси элем. Ошондуктан шайлоо фонду кайсы каражаттардан турганын жакшы билем. Бабанов бул сөзү менен дагы коомчулукту алдабасын" деп белгилейт Фарид Ниязов.
Билдирүүдө ошондой эле Алмазбек Атамбаевдин 2009-жылкы президенттик шайлоого катышканы тууралуу да айтылып, анда Өмүрбек Бабанов ошол кездеги өкмөт башчы Игорь Чудинов менен чогуу республикалык шайлоо штабын расмий жетектеп турушканы белгиленген.
"Мен 2009-жылы да президенттикке талапкер Атамбаевдин шайлоо штабында иштегем жана чыныгы административдик кысымды өзүмдүн жон терим менен сезгем. Биздин үгүт роликтерибизди 1-каналдан түн ичинде гана беришчү. Жалпы Кыргызстан боюнча болгону 30 жерге үгүт баннерин илгенге уруксат берилген. Биздин штабдын кызматкерлерин күнүнө эки жолудан МАИ кызматкерлери токтотуп, текшерүүгө алып турушчу" деп билдирген Фарид Ниязов.
Билдирүүдө ошондой эле талапкер Бабановдун 15-октябрдагы маалымат жыйынында добуш сатып алуу үчүн акчаны бийликтин талапкери таратып жатат деген сөзүнө таң калганы туралуу айтылып, "Бабановдун өзүн жана анын тарапкерлерин шайлоочуларга акча таратып жатат" деген айыптоолор элден чыгып жатканы белгиленген.
Президенттикке талапкер Өмүрбек Бабанов бүгүн маалымат жыйынында 2007-жылкы парламенттик шайлоодо КСДПнын штабын жетектеп, каржылаганын айткан. Ал ошондой эле президент Алмазбек Атамбаевди 2011-жылкы президенттик шайлоодо да каржылык жактан колдогонун, эч качан сатпаганын белгилеген.
Кечки саат 16:30га карай Орусиянын Новосибирск шаарында ачылган тилкеде 170 жаран добуш беришти. Бул тууралуу «Азаттыкка» аталган аймактагы Кыргызстандын вице-консулу Бакыт Үмөтов билдирди.
- Албетте кечки сегизге чейин иштейбиз. Дагы добуш бергени келип жатышат. Азыркы учурга карай эреже бузуулар, арыз-даттануулар катталган жок. Новосибирск, Омск, Томск, Кемерово облустары, Алтай республикасы, Алтай крайы бизге карайт. Андагылар Новосибирск шаарына келип добуш берүүгө укуктуу, - деди вице-консул.
Үмөтовдун маалыматына караганда, бул аймактарда расмий эсеп боюнча, 46 миң чамалуу кыргызстандык жашайт. Алардын 688и гана консулдук каттоодон өтүп, биометрикалык маалыматын тапшырган.
Чет жердеги журтташтар добуш берди
Чет өлкөдөгү кыргызстандыктар добуш берүүдө
Түркияда Бурса шаарынан эки автобус менен келген жүздөй журтташ добуш беришти. Андан тышкары Анталиядагы мекендештер да келишкен. Түркиядагы добуш берүүнү кабарчыбыз Элвира Будайчиева чагылдырууда.