Сооронбай Жээнбеков шайлоонун алдын ала жыйынтыгы чыккандан кийинки маалымат жыйынында тарапташтары менен. 15-октябрь, 2017-жыл

Шайлоодо Жээнбеков алдыга чыкты

16-Октябрь, 2017

Кыргызстанда 15-октябрда өткөн президенттик шайлоодогу добуштар саналууда. Борбордук шайлоо комиссиясынын соңку маалыматына караганда, добуш берүүлөргө 1 миллион 690 миңден ашуун шайлоочу келди. Шайлоого катышуу 55, 93 пайызды түздү.

Акыркы алдын ала эсептер боюнча талапкерлердин арасынан КСДП көрсөткөн экс-премьер-министр Сооронбай Жээнбеков алдыда баратат. Ага шайлоого катышкан элдин 917 миңден ашууну добуш берген, бул 54 пайыздан ашык көрсөткүч.

Ал эми шайлоодогу анын башкы атаандашы, парламенттеги “Республика-Ата-Журт” фракциясынын лидери, депутат Өмүрбек Бабанов экинчи орунда. Ал 564 миңден ашуун добуш топтоп, 33 пайыздан ашуун добушка ээ болду.

“Бүтүн Кыргызстан” саясий партиясынын лидери Адахан Мадумаров 108 миңден ашуун же 5 пайыздан ашык шайлоочунун добушу менен үчүнчү орунга чыкты.

«Ак шумкар» партиясынын лидери Темир Сариев 3 пайызга жакын добуш менен төртүнчү орунда турат.

Дагы бир талапкер Таалатбек Масадыков 10 миңден ашуун шайлоочунун добушу менен бешинчи катарда.

Улукбек Кочкоровго берилген добуштар 0, 55% же 8 миңден ашканы Боршайкомдун сайтындагы электрондук эсепте көрсөтүлүп турат.

Азимбек Бекназаровго 0.16%, Арстанбек Абдылдаев 0.12%, Арсланбек Малиев 0.1%, Эрнис Зарлыков 0.09%, Токтайым Үмөталиева 0.09% добуш алса, шайлоочулардын 0.69 пайызы баарына каршы болгон.

Шайлоодо 11 талапкер ат салышты. Биринчи турда жеңип чыгуу үчүн талапкер шайлоого катышкан элдин 50 пайыздан ашыгынын добушун алышы керек.

Ал эми аймактар боюнча алганда Бабанов менен Жээнбеков төмөндөгүдөй добуш алган.

Чүй облусу: Бабанов — 50,92%, Жээнбеков — 37,26%

Талас облусу: Бабанов 85,55%, Жээнбеков — 12,77%,

Ысык-Көл облусу: Жээнбеков — 50,7%, Бабанов — 42,26%,

Нарын облусу: Жээнбеков — 56,05%, Бабанов — 36,84%,

Жалал-Абад облусу: Жээнбеков — 59,35%, Бабанов — 27,83%

Ош облусу: Жээнбеков — 72%, Бабанов — 18,3%,

Ош шаары: Жээнбеков — 72,3%, Бабанов — 18,73%,

Баткен облусу: Жээнбеков — 57,39%, Бабанов — 20,53%.

Шайлоонун жыйынтыгы улам жаңыланууда.

10:14 15.10.2017

Ошто милиция күчөтүлгөн режимде иштеп жатат

Шайлоо күнү коопсуздукту камсыздоо үчүн шаардагы 73 шайлоо участкасына 600дой милиция бөлүнгөн. Андан сырткары милицияга элдик кошундан куралган адамдар да көмөктөшөт. Бул тууралуу шаардык милициянын маалымат катчысы Замир Сыдыков билдирди.

Ош шаарында 159 352 шайлоочу бар. Калаада 73 добушкана иштеп жатат.

10:13 15.10.2017

Темир Сариев: Бул жолу кара пиар суудай куюлду

Президенттикке талапкер Темир Сариев бул жолку шайлоодо каралоо абдан көп болду деп эсептейт. Бул тууралуу ал добуш бергенден кийин журналисттердин суроолоруна жооп берип жатып айтты жана талапкерлерди токтоолукка жана кечиримдүүлүккө чакырды:

- Үгүт иштери жүрдү. Абдан чоң талаш-тартыш, карама-каршылык болду. Кара пиар суудай куюлду. Талапкерлерге токтоолукту жана кечиримдүүлүктү каалайм. Шайлоонун шайтан оюндары менен мындан ары да өлкөбүздүн ичинде кандайдыр бир чыңалуу болуп кетпеши керек. Шайлоо бүгүн түнү бүтүш керек.

Ошону менен катар Сариев бул жолку шайлоодо бурмалоого эки жагдай шарт түзүшү ыктымал деген пикирин билдирди.

Анын белгилешинче, бюджеттик кызматкерлерди мажбурлап добуш бердирүү жана добуш сатып алуу негизги терс көрүнүштөрдүн бири болууда. Ал эми бюллетендерди топ-тобу менен салуу жана шайлоочуларды ташып алып барып улам бир жерден добуш бердиртүүгө биометрикалык каттоо жол бербейт дейт Сариев.

09:45 15.10.2017

Өмүрбек Бабанов: Мен өзгөрүүлөр үчүн добуш бердим

Талапкер Өмүрбек Бабанов жубайы менен Бишкектеги №70 мектеп гимназияда жайгашкан №1216 шайлоо участогунда добуш берди. Аны менен добушканага уул-кызы да келди. Бабанов добуш бергенден кийин кыска билдирүү жасап, журналисттер менен маектешти. Ал маанайы бүгүнкү күндөй ачык экенин айтып, ар бир адамдын шайлоо укугу бар эркин өлкөдө жашап жатканыма бактылуумун деди:

- Менин талапкерлигим да эл тарабынан каралып жатат. Мен чоң үмүт жана ыраазылык менен элим туура тандоо жүргүзөт деп ишенем. Бүгүнкү күн өлкөнүн тарыхында алтын тамгалар менен жазылат деп ойлойм. Мен өзгөрүүлөр үчүн добуш бердим.

Өмүрбек Бабанов өзүнүн жеңишке жетишээрине ишенип турганын, инаугурация тынч өтөрүн жана өзгөрүүлөр башталарын бекемдеди.

Кыргызстандын мамлекет башчылыгына 11 талапкер ат салышууда.

08:41 15.10.2017

БШК: Бул шайлоодо техникалык мүчүлүштүк болбойт

Мурдагы шайлоолордо автоматтык эсептөөчү үкөктөрдүн жана башка техникалык жабдуулардын бузулган учурлары катталса, бул жолу андай болбойт турганын Борбордук шайлоо комиссиясы убада кылууда. Шайлоого жооптуу мекеменин төрайымы Нуржан Шайлдабекова бул тууралуу бүгүн эртең менен түз ободо жүргүзгөн маалымат жыйынында билдирди:

- Буга чейинки болгон мүчүлүштүктөр адам факторунун натыйжасында болуп келген. Бул жолу андайга жол бербөө үчүн автоматтык эсептөөчү үкөктөрдүн операторлорун башка тартипте окуттук. Ар кандай мүчүлүштүк болгон учурда тез арада жоюу үчүн атайын техникалык колдоо тобу түзүлдү. Алар автоматтык эсептөөчү үкөк жана шайлоочуну идентификациялоо үчүн жоопкерчиликтүү. Мындан тышкары жергиликтүү адистер да келип, жардам беришет.

Кыргызстанда президенттик шайлоо өтүп жатат.

Дагы жүктөңүз