Австралиялык foxsports.com.au интернет баракчасы Бишкектеги бүгүнкү мелдешке тушташ жарыялаган лайв-блогдо австралиялыктар кыргыз футболчуларынын оюнун негизинен жакшы баалап жатышканы көрүнөт.
Daniel Carb ысымдуу күйөрман “Кыргызстан ойной алат экен”, кыргыз оюнчулар “Австралияга террор көргөзүүдө” деп жазса, Ned Zelic деген күйөрман “Бишкектеги күрөш жакшы маанайда ургалдуу жүрүп жатканын”,- белгилейт.
Австралиялык адистердин эсебинде, оюндун биринчи бөлүгүндө кыргызстандык оюнчулар топту биринен экинчисине 144 жолу узатса, австриялыктар топту биринен экинчисине 279 жолу өткөрдү.
Биринчи айлампада топ бир оюнчудан экинчиге так өткөрүүдө 79% кыргызстандыктар, 84% австралиялыктар көрсөттү.
Кыргызстан –Австралия курамаларынын бүгүнкү мелдеши 2018-жылдагы дүйнө чемпиондугуна тандоо оюндарынын 2-баскычынын алкагында өтүүдө.
Кыргызстан курамасынын Азия чемпиону Австралия менен алгачкы беттеши жергиликтүү күйөрмандар арасында чоң кызыгууну жаратып, колдон сатылган билет миң сомго чейин чыкты.
Шаардык милиция оюндун коопсуздугун камсыздоого 2000дей кызматкер тартыларын билдирген. (UE)