8-октябрда Норвегиянын Осло шаарында өтүп жаткан күрөш боюнча Дүйнө чемпионатында кыз-келиндер күрөшүнөн 68 килограмм салмакта кыргызстандык Мээрим Жуманазарова алтын медал утту.
Ал бүгүн, 7-октябрда финалда жапониялык Рин Мияжини 1-айлампада далысын килемге басып, мөөнөтүнөн мурда жеңип алды (4:0).
Рин Мияжи 21 жашта, 2019-жылы жаштар арасында Азия чемпионатында күмүш байге алган. Ал жарым финалда Токио Олимпидасынын чемпиону, Дүйнө чемпионатынын алтын жана коло байгесинин ээси, америкалык Тамира Менсаны жеңип чыккан эле.
Дүйнөлүк күрөш уюмунун расмий сайтындагы маалыматка таянсак, Жуманазарова бул чемпионатта жалпысынан төрт беттеш өткөрдү. Алгач түштүк кореялык балбан Минжи Ханы 8:0, чейрек финалда канадалык Оливия Ди Баккону 7:1 эсебинде утту. Жарым финалда орусиялык Ханум Велиеваны 3:3 эсебинде жеңди.
Мээрим Жуманазарова 22 жашта. Токиодогу өткөн Олимпиада оюндарында коло байге уткан. 2016-жылы кыздар (кадеттер) арасында дүйнө чемпионатында коло байге алган. 2017-жылы жаштар арасында Азия чемпиону аталып, дүйнө чемпионатында коло медал тагынган. Бир нече эл аралык мелдештердин байге ээси. 2020-жылы Сербиянын Белград шаарында өткөн Дүйнө кубогунун жеңүүчүсү. 2021-жылдагы Азия чемпиону. Азия оюндарында коло байге алган. Жуманазарова күрөш боюнча Дүйнө чемпиону болгон экинчи кыргызстандык.
9-октябрда Норвегиянын Осло шаарында өтүп жаткан күрөш боюнча Дүйнө чемпионатында грек-рим күрөшүнөн 60 килограмм салмакта Жоламан Шаршенбеков финалга чыкты. Ал жарым финалда азербайжандык балбан Мурад Маммадовду 4:2 эсебинде жеңди.
Шаршенбеков буга чейин эки беттеш өткөргөн. Алгач беларустук Максим Кажарскини 2:0, чейрек финалда грузиялык Ираклий Дзимистаршвилини 5:2 эсебинде жеңип алган. 9-октябрда финалда молдовалык Виктор Чобану менен күрөшөт.
Бул күнү күрөштүн аталган түрүнөн кыргызстандык Калы Сулайманов (63 кг) жана Марлен Асикеев (67 кг) килемге чыгат.
Шаршенбеков менен Чобану быйыл Токиодо өткөн Олимп оюндарында чейрек финалда беттешип, молдовалык балбан жеңишке жеткен. Жоламан Шаршенбеков менен Виктор Чобану экөө тең 2018-жылы Венгрияда өткөн Дүйнө чемпионатында күмүш байгеге ээ болушкан. Ал кезде Шаршенбеков 55 килограмм салмакта, Чобану 60 килограмм салмакта күрөшкөн.
Тилекке каршы, 7-октябрда грек-рим күрөшү боюнча дүйнө чемпионатынын биринчи мелдеш күнүндө кыргызстандык төрт балбан байгесиз калышкан.
Дүйнөлүк күрөш уюмунун расмий сайтындагы маалыматка таянсак, бүгүн, 7-октябрда байге үчүн Сардар Конушбаев (55 кг), Руслан Царев (72 кг), Кайрат Түгөлбаев (77 кг) жана Калидин Асыкеев (82 кг) күрөштү.
Калидин Асыкеев менен Кайрат Түгөлбаев биринчи беттештеринде азербайжандык балбандарга жеңилсе, Сардарбек Конушбаев менен Руслан Царев биринчи беттештерин утуп, кийин чейрек финалдан өтө албай калышты. Эртең, 8-октябрда дүйнө чемпионатында 60 кг, 97 кг жана 130 килограмм салмакта байгелер ойнотулат. 60 килограмм салмакта Дүйнө чемпионатынын күмүш байгесинин ээси (2018-ж.), 2020-жылдагы Дүйнө кубогун уткан Жоламан Шаршенбеков, 97 килограмм салмакта Бексултан Махмудов күрөшөт.
Ал эми 9-октябрда Калы Сулайманов (63 кг) жана Марлен Асикеев (67) килемге чыгат. 2-октябрда Новрегиянын Осло шаарында башталган Күрөш боюнча Дүйнө чемпионаты 10-октябрда аяктайт.