"Кыргызстан" партиясынын өкүлү Талант Мамытов сот залынан чыкты. Ал судьялар кеңешүүгө кеткенин билдирди. Сотто партия эмне себептен кеч калгандыгы тууралуу жүйө келтирилгенин, сот аны эске аларына үмүт артып турганын кошумчалады. Журналда башка партиялардын деле келген саат оңдолуп жатканын, бирок ага ЖМК өкүлдөрү көңүл бурбай жатканын айтты.
Бишкектин административдик соту «Кыргызстан» партиясынын Борбордук шайлоо комиссиясына (БШК) каршы жазган арызына карата чечимди уктуруу жараянына журналисттер киргизилбей жатат.
27-августта түштөн кийин башталган отурумду судья Чолпон Досмамбетова карап, кечки саат жетиде чечим угузулары айтылды. Бирок чечим чыгаруу учурунда журналисттерге сот залын жаап коюшту. Кабарчылар нааразылык билдирип, анын себебин сурады. Эч ким түшүндүрмө берген жок.