Президенттик шайлоо жана референдумда Түштүк Сахалиндеги добуш берүүнүн жыйынтыгы тууралуу социалдык тармактарда тараган чектердин бири жасалма болуп чыкты.
Бул тууралуу Мыйзам бузууларга ыкчам чара көрүү боюнча координациялык топтун жана БШКнын мүчөсү Тынчтыкбек Шайназаров 10-январда саат 19.30да карата өткөн маалымат жыйында билдирди.
"Азыр тактап чыктык. Бир чектин жасалма экени аныкталды. Түштүк Сахалин жана Тышкы иштер министрлиги менен сүйлөштүк. Протокол түзүлүп, бул жакка жиберилет. Жапаровго 345, Мадумаровго 100 деген биринчи чек туура деп табылды", - деди Шайназаров.
Буга чейин соцтармактарда Орусиянын Түштүк Сахалин шаарындагы добуш берүүнүн жыйынтыгы тууралуу чектердин сүрөттөрү тараган. Анын биринде талапкер Садыр Жапаров 345, Адахан Мадумаров 100 добуш алганы көрсөтүлгөн. Интернетте тараган дагы бир ушуга окшош чекте тескерисинче Жапаров 100, Мадумаров 345 добуш алганы жазылган.
Буга чейинки сааттарга карата өткөн маалымат жыйында журналисттер ыкчам топко бул чектерге байланыштуу суроо берип, Шайназаров ал иликтене турганын билдирген.
Кыргызстанда 10-январдагы кезексиз президенттик шайлоонун баштапкы жыйынтыктары жарыялана баштады. Борбордук шайлоо комиссиясынын (БШК) сайтындагы эсепке ылайык, Садыр Жапаров атаандаштарынан кыйла алдыда.
Электрондук үкөктүн автоматтык эсептөөсүнө ылайык саат 20:15теги маалыматка караганда аны шайлоочулардын 75% көбүрөөгү колдоду. Андан кийин Адахан Мадумаров 6,35%) менен Бабыржан Төлбаев (2,03%) келатат .
Ал эми мамлекеттик башкаруу формасын аныктаган референдумду "президенттик башкарууну" колдогондор көп - 80% тегерегинде.
Бул акыркы эсеп эмес, сандар улам жаңыланууда. Добуштар кол менен да эсептелинет.
Президенттик кезексиз шайлоо жана мамлекеттик башкаруу формасын аныктоо боюнча референдумда добуш берчү кыргызстандыктардын саны 3 563 574 деп айтылган. Саат 18:00гө карата алардын 33% көбү катышты.