Бишкек шаардык соту бүгүн, 11-ноябрда Кемпир-Абад маселесине байланыштуу кармалган жарандык активист Рита Карасартованын бөгөт чарасын өзгөртүү боюнча доо арызды карап, мурдагы инстанциянын чечимин күчүндө калтырды.
Ал буга чейин Биринчи май райондук сотунун чечими менен 20-декабрга чейин Бишкектеги №1 тергөө абагына (СИЗО-1) камалган.
"Биздин кыймыл-аракетибизде эч кандай мыйзам бузуу жок. Биз өзүбүздүн Конституция берген укугубуз боюнча биригип, сүйлөшүп, мыйзамсыз иштерге жол бербейли деген эле аракет болчу. Азыркы жасалып жаткан иштер мыйзамсыз. Кыргызстан укуктук өлкө болот деп ишенебиз", - деди Карасартова сот залында.
10-ноябрда шаардык сот Карасартованын кармалышын мыйзамдуу деп тапкан. Анда активист "башаламандык уюштуруу" боюнча тагылып жаткан айыптарга макул эместигин "Азаттыктын" кабарчысынын суроосуна жооп берип жатып билдирген. Рита Карасартова тергөө жүрбөй жатканын кошумчалаган.
Массалык башаламандык уюштурууга айыпталып, эки айга камалган Нурланбек Асанбековду үй камагына чыгаруу өтүнүчүн Бишкек шаардык сотунун төрагасы Н.Эсеналиевдин атына укук коргоочу Азиза Абдирасулова жолдоду.
Өтүнүч катта Нурланбек Асанбеков 11 жаштагы кызын, улгайган апасын, майыптыгы бар кичинекей баласын караган жалгыз бой ата экендиги, мурда сот жообуна тартылбаганы белгиленген.
Мындан тышкары анын 1-ноябрдан бери ачкачылык кармап жаткандыктан саламаттыгы да начарлаганы тууралуу жазылган.
Укук коргоочу Азиза Абдирасулованын "Азаттыкка" билдиришинче, Асанбеков ачкачылыгын улантып жатат.
"Он күн болду ачкачылык кармаганына. Абалы оор. Ордунан тура албай калыптыр", - деди укук коргоочу.
Нурланбек Асанбеков сот залына дарыгердин коштоосунда алып келингенин "Азаттыктын" сотко катышып жаткан кабарчысы билдирди. Асанбеков сотто саясатчы же активист эмес экенин белгилеп, Кемпир-Абад боюнча кармалган саясатчылардан Равшан Жээнбековду гана тааный турганын, соңку айларда анын үйүн оңдоп жатканын айтты. Асанбеков анын жана жакындарынын банк эсептери жабылгандыктан, ири өлчөмдө насыяларын төлөй албай ачкачылык кармоого аргасыз болгонун кошумчалады.