Улуттар Уюмунун адам укуктары боюнча жогорку комиссары Волкер Түрк Газадагы инфекциялык илдеттер жайылышы жана ачарчылык болушу ыктымал экенин эскертти. Жакынкы Чыгышка барып кайткандан кийин дипломат азыр мындай коркунуч чоң экенин белгиледи.
Ал эми БУУнун Гуманитардык маселелерди координациялаган башкармалыгы тилкенин түндүгүндө, Газа шаарынын айланасында 24 оорукананын ичинен бирөө гана бейтаптарды кабыл алып жатканын билдирди. Маалыматка караганда, 18 оорукана жабылып, ал жердегилер эвакуацияланды. Беш медициналык жай, анын ичинде Аш-Шифа комплекси ооругандарды кабыл албай, бейтаптарга эң зарыл деген гана, чектелген жардам көргөзүүдө.
“Ал ооруканаларга жете албай жатабыз, электр энергиясы өчкөн, алардын бейтаптарды кабыл алууга чамасы жетпейт”, - деп билдирди БУУнун башкармалыгы.
Ал арада Израил Аш-Шифа оорукана комплексинде аскердик операциясын улантты. ХАМАС (АКШ жана Еврошаркетте террордук деп таанылган) радикал тобунун көзөмөлүндөгү Газанын Саламаттык сактоо министрлиги израилдик бульдозерлер оорукананын бир тарабындагы кире беришти сүрдүрүп салышканын билдирди.
Израилдин бийлиги комплексте жана анын алдында хамасчылардын командалык пункту жайгашкан деп келатат. ХАМАС жана дарыгерлер муну четке кагууда.
БУУнун эсебинде, комплексте кеминде 2300 киши – бейтаптар, оорукана кызматкерлери жана жер которгон палестиналыктар бар, алар айланада салгылашуу токтобой жатканынан улам чыга албай калган болушу мүмкүн.
Израилдин армиясы – ЦАХАЛ 16-ноябрда жердеги операциянын алкагында ХАМАС (АКШ жана Еврошаркетте террордук деп таанылган) радикал уюмунун саясий кеңешинин төрагасы Исмаил Ханиянын резиденциясына сокку урганын билдирди. Ал турак жай Газа тилкесинин сыртында жайгашкан. Жабыркагандар тууралуу айтылган жок. Айрым булактар Хания Газада эместигин жазышты.
Маалыматка ылайык, аскерлер резиденция “террордук инфраструктура” катары жана ХАМАСтын жогорку жетекчилеринин “Израил жарандарына жана ЦАХАЛга каршы теракттарды уюштуруу талкууланган кездешүүлөрү” үчүн колдонулган деп эсептешет.
Израил ошондой эле Шати лагеринде жана дагы бир нече жерде согушкерлердин курал-жарагы катылган жайлар табылып, жок кылынганын билдирди.
Өзбекстандын президенти Шавкат Мирзиёевдин жубайы Зироатхан Мирзиёева Палестинага тилектештик билдирген саммитке катышты. Жыйын Стамбулда Түркиянын биринчи айымы Эмине Эрдогандын жетектөөсүндө өткөнүн Өзбекстандын мамлекеттик кабар агенттиги жазды.
Маалыматка караганда, Мирзиеева "эл аралык коомчулуктун тынчсыздануусуна жана кысымына карабай, трагедия жана кыйроолордун масштабы кеңейүүдө, апааттын аягы көрүнбөйт", - деп айтты.
Өзбек биринчи айымы Ташкенттин позициясын билдирди жана тараптарды согуштук аракеттерди дароо токтотууга, гуманитардык жардам жеткирүүгө шарт түзүүгө, жаңжалды «эки элге эки мамлекет» деген принциптин негизинде дипломатиялык жол менен чечүүгө чакырды.
Кабар агенттиги Мирзиёева "өзбек эли палестин эли менен тилектеш" деп айтканын жазды.
Саммитке Малайзиянын канышасы Тунку Азиза, Катардын шейхинин энеси Моза бинт Насер аль-Миснед, Ливандын премьер-министринин жубайы Мэй Микати, Пакистан өкмөт башчысынын жубайы Садия Рахматулла жана башкалар катышты.
Израилдин куралдуу күчтөрү палестиналыктарга Газанын түштүгүндөгү айрым жерлерден чыгып кетүүнү эскерткен баракчаларды таштаганын жергиликтүү тургундар 16-ноябрда айтып беришти. Ассошиэйтед Пресс агенттиги бул – ЦАХАЛ жүз миңдеген киши ооп кеткен аймакка да чабуул коюуну көздөп жатат дегенди туюндурушу мүмкүн деп жазды. Гуманитардык кызматкерлер БУУ түзгөн башкалкалоочу жайлар анклавдын түндүгүнөн түштүк аймакка агылган карапайым газалыктарга толуп калганын айтып жатышат.
Ал арада израилдик аскерлер Газадагы эң ири Аш-Шифа ооруканасында операциясын улантып, имараттардын биринде табылган курал-жаракты көргөздү. Бирок комплексте ХАМАС (АКШ жана Еврошаркетте террордук деп таанылган) радикал тобунун командалык борбору жайгашканы тууралуу далил бере элек. Согушкерлер жана оорукананын кызматкерлери ал жерде командалык пункт жок экенин айтып келишет.
ХАМАС радикал тобунун көзөмөлүндөгү Газанын Саламаттык сактоо министрлиги израилдик бульдозерлер оорукананын бир тарабындагы кире беришти сүрдүрүп салганын билдирди.
Human Rights Watch эл аралык коргоо уюму Аш-Шифада табылган куралдын сүрөттөрү оорукананы согуш мыйзамдарына ылайык корголгон жай деген макамынан ажыратууга негиз бербейт деп билдирди.
Уюм ооруканалар эл аралык гуманитардык укукта өзгөчө корголорун эске салды.
Ал арада Улуттар Уюмунун адам укуктары боюнча жогорку комиссары Волкер Түрк Газада инфекциялык илдеттер жайылышы жана ачарчылык болушу ыктымал экенин Жакынкы Чыгышка барып кайткандан кийин эскертти.