Дүйнөлүк Саламаттык сактоо уюму (ДССУ) Газадагы саламаттык сактоо тармагы апаат коркунучуна кептелгенин эскертти. Уюм 31-октябрдагы билдирүүсүндө, жер которгондор көбөйгөнүн, суу, канализация системалары кыйраганын белгиледи. Уюмдун басма сөз катчысы Кристиан Линдмайер карапайым тургундар арасында Израилдин бомбалоолоруна туздөн-түз байланышпаган жоготуулар көбөйүшү ыктымал деп айтты.
Газанын Саламаттык сактоо министрлиги Израил соккуларын баштагандан бери 8 миң 300дөн ашуун палестиналык өмүр менен кош айтышканын билдирген. Израил тараптан 1400 кишинин каза болгону кабарланган. Алардын басымдуу бөлүгү ХАМАС 7-октябрда Израилге кол салганда өлгөн.
Өткөн аптада жөөт армиясы жерде операция баштады.
БУУнун Балдар фондунун (ЮНИСЕФ) өкүлү Жэймс Элдер суунун тартыштыгынан чарчап калган наристерлер көбөйүшү мумкүн деп эскертти. Анын айтымында, балдар туздуу суу ичип ооруп жатат, 940 чакты жеткинчек дайынсыз болууда.
"Алардын айрымдары урандылардын астында калган болушу мүмкүн", -деп кошумчалады Элдер.
Дагы бир тобу алган жаракаттан, стресстен жабыркаган.
Шейшембиде БУУнун гуманитардык жардам боюнча агенттиги тилкени суу менен камсыздоо “белгисиз себептерден” токтоп калганын билдирген.
Линдмайер Газага күйүүчү майды өткөрүүгө уруксат берилиши керек деп айтты.
Израил "кара майды ХАМАС өзүнүн кыянат максаттарында пайдаланышы ыктымал" деген негизде ага уруксат бербей жатат.
Чечен лидери Рамзан Кадыров массалык тополоңдордун алдын алууну жана зарыл болсо, катышуучуларды “чекеге” атууну тапшырды. Мунун алдында Дагестандын борбор шаарындагы аэропортту антисемиттик акцияга чыккан топ басып алган эле.
Кадыров “Бизде тополоңго бир киши чыга турган болсо, кармап, отургузгула. Же болбосо эскертүү иретинде асманга үч жолу ок чыгарып, ал адам мыйзамга баш ийбесе, чекеге аткыла. Андан кийин чыкпай калышат. Бул менин буйругум”, - деген ал.
Чечен жетекчисинин өкмөт жыйынында айтылган мындай сөздөрун РИА Новости жазды.
Кадыров Путин сыяктуу эле антисемиттик акцияларга Киев жана Батыш "шыкакчы" болгон деп айыптады.
Украинанын Тышкы иштер министрлиги Москванын дооматын күнөөнү өзүнөн башкага оодаруу аракети деп атады.
Махачкаладагы окуянын катышуучулары Газадагы палестиндерди коргоо үчүн чыгышканын айтышкан.
Кадыров өзү социалдык тармактарда Израилди “геноцид” кылып атат деп айыптап, нацисттик Германияга салыштырган.
Дагестанда башаламандыкка байланыштуу 83 киши кармалды. Аларга кандай айып тагылганы белгисиз.
Газанын түндүгүндөгү Жабалия качкындар лагеринде шейшембинин кечинде катуу жарылуу болуп, көптөгөн кишинин өмүрүн алып кеткени кабарланган. Израил ошол районго сокку урганын моюнга алып, ХАМАС радикал тобунун жогорку жетекчисин жок кылууну көздгөнүн айтты.
Газа тилкесинин Саламаттык сактоо министрлиги 50 карапайым киши мүрт кеткенин, 150 чактысы жарадар болгонун кабарлады. Би-Би-Синин жазганына караганда, Палестина тарап жарылуу Израилдин аба соккусунан кийин болгонун маалымдаган.
Рейтер агенттиги жарыялаган сүрөттөрдө лагердеги кыйроолорду, уранды арасынан аман калгандарды издеген кишилерди көрүүгө болот.
AFP агенттигинин кабарчысы да Жабалияга барып кетти. Агенттик маалымдагандай, ал тарткан кадрда бери дегенде 47 кишинин сөөгү байкалат.
Америкалык CNN телеканаы күбөлөргө жана дарыгерлерге шилтеме менен “Эл жыш жайгашкан кварталда иш алып барган ХАМАСтын отрядынын командирин бутага алган Израилдин соккусу апаатка алып келди. Соккудан көптөгөн киши каза тапты”, - деп билдирди.
Израил армиясынын өкүлү Даниэл Хагари согуш учактары Жабалиядагы качкындар лагерине сокку урганын бышыктады. “Борбордук Жабалия” батальонунун кол башчысы өлтүрүлгөнүн кошумчалады.
Хагаринин айтымында, “террорчуларга жана алардын инфраструктурасына” катуу сокку урулду, “көп сандагы террорчулар” жок кылынды, “жер астындагы инфраструктурасы кулап калды”.
Израилдин бийлиги газалыктарды түштүк тарапка көчүүгө чакырып келатат. Бирок айрым эл аралык уюмдардын өкүлдөрү бүтүндөй Газа тилкеси кооптуу жерге айланганын айтып, андай эскертүү маанисиз деп белгилешет.
Египет менен Газанын ортосундагы Рафах чек ара пункту шаршембиде эртең менен аймакта калган чет элдиктерди жана изралдиктердин аба соккуларынан жарадар болгон ондогон жергиликтүү кишилерди чыгаруу үчүн убактылуу ачылды.
«Рейтерс» агенттиги мындай макулдашууга Катардын ортомчулугу менен жетишилгенин билдирди. Сүйлөшүүлөргө АКШ дагы катышкан.
Маалыматтарга караганда, 1-ноябрда ал жерден 500 киши өткөрүлөт.
Араб маалымат каражаттары Египеттен Газага бир нече тез жардам машинеси бет алганын, алар 81 жарадар кишини алып кетерин кабарлашты.
Газа тилкеси менен Египеттин ортосундагы жападан-жалгыз чек ара өткөөлү кадимки режимдеги ишин токтоткон. Египет палестин качкындарынын агымынан чочулайт. Анын үстүнө Израил анын айланасына сокку урганы да айтылган. Рафах акыркы жумаларда бир нече жолу гуманитардык жүктү коё берүү үчүн ачылган.
Анклавды башкарган ХАМАС радикал тобу 7-октябрда Израилге кол салгандан кийин жөөт армиясы Газаны бомбалап, бир нече күн мурун жерде операция баштаган. Тилкедеги гуманитардык абалды эл аралык уюмдар «апаат» деп сүрөттөшөт.
Газанын Саламаттык сактоо министрлиги жаңжал башталгандан бери 8 жарым миңдей киши каза тапканын, көбү балдар менен аялдар экенин билдирди.
Израил тараптагы жоготуулар 1 миң 400 киши деп кабарланган.