Адвокат Таалайгүл Токтакунова Башкы прокуратурага кайрылып, кыргыз жараны Орхан Инандынын Түркияга жашыруун чыгарылып кеткенине байланыштуу кылмыш ишин козгоону өтүндү.
Ал башкы көзөмөл органы бул ишке тиешелүү адамдарды жоопко тартуу боюнча сотко чейинки өндүрүш башташы керектигин талап кылууда. Таалайгүл Токтакунованын "Азаттыкка" билдиргени боюнча, арызда мындан тышкары Орхан Инандыны эл аралык нормаларга ылайык, Кыргызстанга кайтаруу талабын коюу суранычы да жазылган.
6-июлда Кыргызстандын акыйкатчысы Токон Мамытов чет өлкөлүк атайын кызмат тарабынан уурдалган кыргыз жараны Орхан Инандыны кайтарып берүү талабы менен Түркиянын омбудсменине кайрылган.
"Ал биздин жаран. Анын өзүнө барып жолугуп, жайын билип, сурап, анын укугун коргоп берүүсүн, биздин жаран катары аны мекенине кайтарууга жардам берүүсүн сурадым. Ал эми бийлик нота менен гана чектелбей, аны "алып кеткен жериңерге сак-саламат кайтаргыла" деп талап кылышыбыз керек", - деген Мамытов "Азаттыктын" "Эксперттер талдайт" программасында.
Токон Мамытов Түркиянын атайын кызматы кыргыз жарандыгын алган Орхан Инандыны уурдап кеткенин сынга алды. Ошондой эле, эл аралык мыйзамдарды, жалпы адам укугу, саясий укуктар боюнча БУУнун декларациясындагы талаптар бузулганын белгиледи.
Кыргызстандын Түркиядагы элчиси Кубанычбек Өмүралиев 6-июлда Түркиянын тышкы иштер министринин орун басары Явуз Селим Кыран менен жолукту. Анда Орхан Инандынын Кыргызстандан Түркияга тымызын алынып кетишине байланыштуу Бишкек Анкарага нота жөткөнүн расмий билдирди. Инадынын кайда экени тууралуу маалымат берүүнү жана аны менен консулдук кызматкерди жолуктурууну өтүндү.
Кыргызстандын ТИМи Явуз Кыран бул өтүнүчү өз өлкөсүнүн Юстиция министрлигинин кароосуна жөнөтүлөрүн айтканын билдирди. Ошондой эле ал Инанды түрк жараны экенин белгилеп, анын кайда экенин билбей турганын кошумчалаган.
Парламент Орхан Инанды боюнча күч органдарынын маалыматын угуп жатат.
Дастан Бекешев: Адам уурдоо боюнча иш козголушу керек. Эмнеге биз Башкы прокуратуранын өкүлүн чакырган жокпуз? Бизде контрчалгындоо деген барбы? Орхан Инандыны кантип алып кетишкен?
Уларбек Шаршеев: Бизде жүк катары алып кеттиби же башкабы, маалымат жок. 1-июндан баштап тапшырма берилген. Чек арадан өткөндөрдү, Инандынын жакындары менен тыгыз иштешип аттык. Жүктү текшерүү Бажы кызматынын иши.
Дастан Бекешев: Силер Түркиядан сурайсыңарбы кантип уурдап кетишкенин. Биздин өлкөдө башка мамлекеттин чалгын кызматы келип, адамдарды уурдап кетсе болобу. Баары кире берсе болот турбайбы. Бул уят.