Орхан Инанды Анкара шаардык полициясына өткөрүлүп берилип, тергөө изоляторунда 11-июлга чейин калтырылды. Бул тууралуу Түркиянын "Демирөрен" маалымат агенттиги билдирди.
Түркиянын жергиликтүү ЖМКлары 53 жаштагы Орхан Инандынын тергөөсү 8-июлда башталганын, адвокаты карындашынын күйөөсү Халил Ибрахим Йылмаз экенин жазышууда.
Бирок Инандыга кайсыл берене боюнча айып тагылганы так айтыла элек. Буга чейин "Анадолу" маалымат агенттиги Инандыга "Куралдуу террордук уюмду негиздегени же жетектегени" үчүн айып тагылганын жазган.
Орхан Инандынын Түркияда табылышына байланыштуу жарандык коомдун нааразылык акциясы өтүүдө. Акциянын катышуучулары "Мугалим - мөмөлүү дарак", "Агартуу кызматкерлери коркунучта", "Бүгүн Орхан, эртең Кыргызстан" деп кыйкырып чыгышты.
Камчыбек Ташиев: Гүлен кыймылынын масштабын биз Орхан Инанды жоголгондо көрдүк. Ага чейин маани бербептирбиз. Алардын кандай финансы булагы, адамдык ресурсу бар экенин билдик. Керек болсо айрым депутаттар, чоң кызматта отургандарды да иликтеп жатабыз.