5-июнда өлкө аймагында дагы 37 адамга коронавирус жукканы аныкталды. Ушуну менен СOVID-19га чалдыккандардын саны 1936га жетти. Эки адам каза болду.
Каза болгондордун бири Бишкек шаарындагы Улуттук фтизиатрия борборунда дарыланып жаткан 82 жаштагы бейтап.
Экинчи бейтап - 34 жаштагы келин Ош облустук бириктирилген ооруканасында дарыланып жатып каза болду.
Бир суткада коронавирус менен 37 адам жаңы катталды.
Алардын арасынан эң көбү Бишкекте - 14 адам. Чүй облусунда жети, Нарын облусунда алты, Ош облусунда беш, Ысык-Көл облусунда үч, Баткен облусунда жана Ош шаарында бирден адам. Кечээтен бери 48 бейтап айыгып, ооруканадан чыгарылды.
- Жалал-Абад облусунда – 163,
- Ош облусунда – 231,
- Ош шаарында - 212,
- Чүй облусунда – 276,
- Бишкек шаарында – 613,
- Баткен облусунда – 31,
- Нарын облусунда – 387,
- Ысык-Көл облусунда – 18 киши.
- Алардын 378и медкызматкерлер.
Обсервацияда жаткандардын саны 2132 адам. 1953 адам айыкты. 574 адам ооруканада, 12 адам оор абалда. 3 адам реанимацияда жатат. 22 адам каза болду.
COVID-19: Бир суткада каза болгондор тууралуу маалымат берилди
Кыргызстанда 5-июнга карата бир суткада коронавирустан кийин каза болгон эки бейтаптын өлүмүнө алардын эски оорулары күчөгөнү себеп болду. Бул тууралуу саламаттык сактоо министринин орун басары Нурболот Үсөнбаев билдирди.
Анын айтымында, кайтыш болгондордун бири Бишкек шаарындагы Улуттук фтизиатрия борборунда коронавируска чалдыккандар үчүн атайын ачылган бөлүмдө дарыланып жаткан 82 жаштагы бейтап болчу.
«COVID-19 деген диагноз коюлган. Кант диабети, өтө жогорку коркунучтагы гипертония оорусу, жүрөк оорусу да бар экен. Анын кызы «Автомаш-Радиатор» заводунда коронавирус жуккан адам менен контакт болгондуктан дарыланып жаткан. Кызы менен контакт болгондуктан ага да жугуп, эски оорулары козголуп, COVID-19ду көтөрө албай, оор абалга келип, ооруканадан каза болуп калды. 30-майда анализинен коронавирус табылгандыктан ооруканага жаткырылган», - деди ал.
Экинчи бейтап - 33 жаштагы келин Ош облустук бириктирилген ооруканасында дарыланып жатып каза болду.
Үсөнбаевдин айтымында, «ал ооруканада ак кан илдетинен дарыланып жаткан. Коронавируска чалдыккандар менен контакт болгонуна байланыштуу анализ алынып, анда да бул оору бар экени аныкталган. Интенсивдүү дарыланууга алынган, реанимацияда жаткан. Бирок көрүлгөн аракеттерге карабастан каза болуп калды».
Жалпысынан 18-марттан 5-июнга чейин Кыргызстанда коронавирус 1936 адамдан табылды, алардын ичинен 22 бейтап кайтыш болду, 1340 адам сакайып кетти.
Казак бийлиги пандемия убагында жарандарды митингге чыкпоого үндөдү
Казакстандын саламаттык сактоо министри Елжан Биртанов карантин убагында массалык иш-чараларга тыюу салынганын, адамдардын топтолушу инфекциянын жайылышына шарт түзөрүн билдирди.
Буга чейин эки оппозициялык топ жарандарды 6-июнда Казакстандын бир нече шаарында митингдерге чыгууга чакырган. Алардын бири - бозгундагы мурдагы банкир Мухтар Аблязов негиздеген «Казакстандын демократиялык кыймылы», экинчиси журналист жана активист Жанболат Мамай жетектеген Демократиялык партия түзүү боюнча демилгелүү топ.
Ал ортодо болжолдуу митингдердин алдында Казакстандын шаарларында активисттер кармалып жатканы кабарланууда. Алардын буга чейинки митингдерге катышкандары административдик камакка алынып, «тынч жыйындарды өткөрүү эрежелери тууралуу мыйзамды бузуу» үчүн айып төлөөгө милдеттендирилүүдө.
Өткөн айда эл аралык укук коргоо уюмдары Казакстандын бийлиги карантинден пайдаланып активисттердин укуктарын чектеп, аларга басымды күчөтүп жатканына тынчсызданарын билдиришкен.
Ал эми Орусияда соңку бир күн ичинде дагы 8700дөн ашык адамдан коронавирус табылды, ошентип ооругандардын жалпы саны 450 миң адамга чукулдады.
Илдеттен акыркы бир күндө Орусияда 144 бейтап көз жумду жана бул оору алгач катталгандан бери жалпысынан 5500дөн ашык жаран ажал тапты.
Орусия оору жугузгандардын саны боюнча дүйнөдө үчүнчү орунда турат.
Сап башындагы АКШда COVID-19 1,8 миллиондон ашык адамдан табылып, илдеттен 108 миңден көп бейтап көз жумду.
Экинчи орундагы Бразилияда короноавирусту 615 миңге жакын киши жугузуп алды, 34 миңден көп киши мерт болду.
Дүйнө жүзүндө ооругандар 6,5 миллион адамдан ашып, оору 386 миңден көп кишинин өмүрүн кыйды.
Республикалык штаб: коронавирусту базарлардан жугузуу коркунучу көп
Бишкекте базарларда вирус жугузуп алуунун коркунучу көп экени байкалууда. Көпчүлүк жарандар беткап тагынбай жана аралыкты сактабай жатышат. Бул тууралуу COVID-19 пандемиясына каршы күрөш боюнча республикалык штабдын 5-июндагы жыйынында айтылды.
Маалыматка караганда, илдет жугузгандардын бири инфекцияны шаардагы үч ири базардын биринен жугузушу мүмкүн. Буга байланыштуу республикалык штаб мэрияга санитардык-эпидемиологиялык чараларды күчөтүүнү сунуш кылды.
Мамлекеттик органдарга жана жергиликтүү бийлик органдарына ата мекендик компанияларга беткаптарды жана антисептиктерди өндүрүүгө көмөктөшүү тууралуу тапшырма берилди.
Үй карантинин сактоо, коомдук жайларда дезинфекциялоо иштерин жүргүзүү маселеси көтөрүлдү. Коомдук жайларда милдеттүү түрдө беткап тагынуу, Саламаттык сактоо министрлигинин сунуштарына кайдыгер карабоо, иммунитетти көтөрүп, социалдык аралыкты сактоо тууралуу элге сунуш айтылды.
Бишкек мэриясы маалымдагандай, калаанын бардык базарларында бирдиктүү стандарт киргизилген, ага ылайык бул мекемелердин жетекчилиги санитардык талаптардын сакталышына жооптуу. «Дордой» базарында күн сайын дезинфекциялоо жүрүп жатат.
Ага карабай элдин талаптарды сактабай жатканы кооптонуу жаратууда. «Республика - Ата Журт» фракциясынын 5-июндагы жыйынында депутат Адыл Жунус уулу коронавирус пандемиясынын кооптуулугу жөнүндө эл арасында түшүндүрүү иштерин күчөтүш керектигин билдирди.
Депутат Кыргызстан Борбор Азияда оорунун жайылышы боюнча Тажикстандан кийинки экинчи орунга чыкканын эске салып, муну эреженин сакталбаганы менен байланыштырды:
«Кичинекей мамлекет болгонубуз менен коронавирус жугузуп алгандардын саны эки миңге жетип калды. Бизде тартип жок. Катуу тартип болгондо гана вирусту жеңе алабыз. Жайында ушундай болуп атат. Дагы ушул абал кайталана берсе, күз-кыш бою үйдө отурууга туура келет. Февралдын башында Кытайга барганда, ал жакта тартипти кандай сакташарын көрдүк. Бизде автобус-троллейбустарда элдин жарымы беткапчан жүрөт. Дүкөндөргө барганда беткап тагынышпайт. «Базарда эмнеге беткап тагынбайсыңар?» - деп сурасаң кайра күлүшөт».
Жалпысынан 18-марттан 5-июнга чейин Кыргызстанда коронавирус 1936 адамдан табылды, алардын ичинен 22 бейтап кайтыш болду, 1340 адам айыгып кетти.
COVID-19 пандемиясына каршы күрөш боюнча республикалык штаб жарандарды оорунун белгилери байкалган учурда өзүн-өзү дарылабастан, медициналык мекемелерге, 112 (ӨКМ) жана 118 (Бишкек) Call-борборуна кайрылууга чакырат.