АКШда ооругандар көбөйдү
Коронавирустун "дельта" штаммы тез тарап жатканына байланыштуу Кошмо Штаттарда илдетке чалдыккандардын саны өстү. Ооруканага түшкөндөр да көбөйдү.
Июль айында жогорку көрсөткүчтөр вакцинация жай жүргөн гана аймактарда катталса, азыр дээрлик баардык штаттарда коронавирус жайылып жатат. Өзгөчө Арканзас, Флорида, Луизиана жана Миссисипи штаттарында кырдаал курч.
Бир суткада вирусту жуктургандардын орточо эсеби 110 миңден ашып жаткан болсо, соңку эки аптада бул сан эки эсе жогорулады. 65 миң адам ооруканада, күнүнө 500дөй киши коронавирустун айынан көз жумуп жатат. Бул эки аптага караганда 100% көп.
Каза болгондордун жана ооруп калгандардын көбү вакцина албагандар. АКШда 12 жаштан жогорку курактагылардын 60% эмделди.
Күзүндө мектептер менен бала бакчалар ачылат
Окуучулардын жана тарбиялануучулардын көпчүлүгү үчүн дээрлик эки жыл жабык турган мамлекеттик мектептер менен бала бакчалар быйыл жаңы окуу жылында кадимки тартипте иштөөсүн уланта баштайт. Бул тууралуу Билим берүү жана илим министрлигинин адиси Гүлшан Абдылдаева билдирди.
Анын айтымында, кызматкерлердин көбү коронавируска каршы эмдөөдөн өткөндүктөн ушундай чечим кабыл алынууда.
“Эмдөөдөн дагы эле өтүп жатышат. Бүгүнкү күнгө карата мектептердин жана бала бакчалардын кызматкерлеринин 70% ашыгы вакцина алды”.
Абдылдаева окуучулардан милдетүү мектеп формасын кийип келүү талап кылынбай турганын, себеби пандемия шартында көпчүлүк ата-энелер каржылык жактан кыйналып турушканын кошумчалады.
Коронавируска байланыштуу 2020-жылдын мартында жабылган мамлекеттик жана муниципалдык окуу жайлар толук ачыла элек.
Коронавируска каршы республикалык ыкчам штабдын 10-августтагы маалыматына караганда, кечээтен бери Кыргызстанда бул инфекциядан дагы алты адам каза болду.
Жалпысынан өлкөдө коронавирустан көз жумгандардын расмий саны 2413 адамга жетти.
Соңку бир күн ичинде вирус дагы 471 адамдан табылды. Алардын эң көбү Бишкек шаарында (212) жана Чүй облусунда (110).
Өлкөдө бул оору жуккандардын расмий катталган саны 169 971 адамга жетти.
Бир күндө 995 адам айыгып чыкты. Азыр ооруканада 2609 адам жатат, дагы 4481 бейтап үйдөн дарыланууда.
Адистер расмий статистика чыныгы абалды чагылдырбай жатканын, ооругандар да, каза болгондор да андан көбүрөөк экенин айтып келишет.
15-июнда Саламаттык сактоо жана социалдык өнүктүрүү министрлиги өлкөдө коронавирус эпидемясынын үчүнчү толкуну жүрүп жатканын расмий билдирген.
Кыргызстанда коронавируска каршы жамааттык иммунитет калыптанышы үчүн 2 миллион 400 миң адам эмдөөдөн өтүшү керек. Бул тууралуу 5-августта вице-премьер-министр Жылдыз Бакашова билдирди.
Саламаттык сактоо жана социалдык өнүктүрүү министрлигинин соңку маалыматына караганда, эмделгендердин жалпы саны 651 миңге жетти. Алардын 140 миңи экинчи дозасын да алышты.
Ошентип, эмделүүгө тийиш болгондордун 27% толук эмдөөдөн өттү. Бул көрсөткүч 70% жеткенде жамааттык иммунитет калыптанарын адистер айтууда.