Министрлер кабинетинин төрагасынын орун басары Жылдыз Бакашова ушул аптада Кытайдан Sinopharm вакцинасынын 1 миллион 250 миң дозасы алынып келерин билдирди. Анын 150 миңин Бээжин жардам ирээтинде бекер берген, калганын кыргыз өкмөтү сатып алган.
“Андан сырткары азыркы тапта дагы ушунча өлчөмдөгү кошумча вакцина сатып алуу жагы каралып жатат”, - деди Бакашова.
Кыргызстан Кытайдан сырткары Орусиядан дагы вакцина алган.
COVAX программасынын алкагында AstraZeneca вакцинасынын 210 миң кишиге жеткидей дозасы келери маалымдалган, бирок анын датасы белгисиз.
Буга чейин Ourworldindata.org сайты дүйнөдөгү коронавируска каршы эмдөөнүн картасын чыгарган. Анда Кыргызстан вакцина жараяны начар жүргөн өлкөлөрдүн катарына кошулуп, 160-орунга жайгашкан.
Кыргызстанда соңку бир күндүн аралыгында коронавирусту 1198 адам жуктуруп алып, тогуз бейтап ажал тапты. Ошентип ооругандардын жалпы расмий саны өлкөдө 134,5 миңге чамалады. COVID-19дан баш-аягы 2063 адам көз жумду.
Бир күндүн ичинде 10,5 миңдей ПЦР анализ алынды.
Ушул тушта ооруканаларда 4253 киши жатат жана 184 бейтаптын абалы оор. Коронавирус болгон 12 миңден көп адам үйлөрүндө дарыланып жатат.
Акыркы бир күндүн ичинде коронавирус 38 медицина кызматкеринен аныкталды жана оору жуктуруп алган дарыгерлердин жалпы саны 5682 болду.
Кыргызстанда соңку бир күндүн ичинде 1233 адамдан коронавирус аныкталып, сегиз бейтап көз жумду. Саламаттык сактоо жана социалдык өнүктүрүү министрлигинин маалыматына ылайык, илдет жуктуруп алгандардын көбү (789 адам) Бишкек шаарында катталды.
Өлкөдө жалпысынан коронавирус болгондордун саны 133 миңден ашып, 2054 бейтап каза болду.
Бир күндүн ичинде коронавирус 30 медицина кызматкеринен табылды. Оору жуктуруп алган дарыгерлердин жалпы саны 5,5 минден ашты.
Ооруканаларда ушул тушта төрт миңден көп бейтап жатат жана 170тен көбүнүн абалы оор. Коронавирус жуккан 12 миңден ашык киши үйүнөн дарыланууда.
Бишкек: коронавирус аныкталган 431 адамдын оорусу симптомсуз
Бишкек мэриясынын маалыматына караганда, COVID-19 вирусуна чалдыкканы 4-июлда лабораториялык жактан тастыкталган 907 адамдын 431и оорунун симптомдорун сезген эмес. Алар оорулуу адамдар менен байланышта болгону үчүн текшерилген кезде аныкталган.
Калаа башчылыгы ошондой эле оору аныкталгандардын ичинен 776 адам Бишкекте катталганын, 131 киши башка жактан келгендер экенин билдирди.
907 адамдын 35и ооруканага жаткырылган.
Кыргызстанда 4-июлда COVID-19 илдети дагы 1401 кишиден жаңы аныкталды, илдеттен он адам каза болду. Ушуну менен коронавируска чалдыккандардын жалпы саны 130 633 кишиге жетти. Оорудан жалпысынан 112 644 адам сакайды. Жалпысынан оорудан көз жумгандардын саны 2037 адамга жетти.
Өлкөдө былтыр июндун акырында жана июлдун башында ооругандардын жана өлгөндөрдүн саны эселеп өсүп кеткен. Ал кездеги жоготуулар "кара июль" деген аталыш менен элдин эсинде калган. Эң жогорку көрсөткүч катары 2020-жылдын 15-июлунда 85 адам каза болгону, 19-июлунда илдет бир суткада 1485 кишиден табылганы айтылып жаткан.
