Бийлик шайлоону башкача өткөргүсү келет
Президент Садыр Жапаров Жогорку Кеңешке шайлоого аралашкан мамлекеттик кызматкерлер жумуштан эле алынбастан жоопкерликке да тартылат деп убада берди. Ал жергиликтүү бийлик жетекчилерине кайрылып, Кыргызстанда шайлоону дүйнө таң калгыдай кылып таза өткөрүүгө чакырды. Бул жолу парламенттик шайлоо жаңы Конституция, жаңы шайлоо мыйзамдары, бир катар жаңы эрежелер менен өткөнү турат. Өлкөдө кайсы гана бийлик келбесин шайлоону калыс атаандаштыкта уюштуруу убадасын бергени менен көп учурда ал массалык нааразылык, айрымдары революция менен бүтөт.
