Садыр Жапаров Кытай-Кыргызстан-Өзбекстан темир жолу 2024-жылы башталарын билдирди
Президент Садыр Жапаров Кытай – Кыргызстан – Өзбекстан темир жолунун курулушу келерки жылы башталарын 15-декабрда Бишкекте өтүп жаткан Элдик курултайда билдирди. Долбоордук техникалык-экономикалык негиздемеси даярдалып бүткөнүн, бул жолдун салынышы өлкөнүн бардык экономикалык тармактарына таасир этерин белгиледи.
“Кудай буюрса, жакында “Кытай – Кыргызстан – Өзбекстан” темир жолунун курулушу башталат. Темир жолдор аркылуу Кытайдан Кыргызстан, Өзбекстан аркылуу Афганстанга транзит менен жүк ташыган контейнерлерди ташуунун пилоттук долбоору улантылат. Ошондой эле “Иран – Түркмөнстан – Өзбекстан – Кыргызстан” пилоттук контейнердик поездин ишке киргизүү маселеси каралууда”, - деди Жапаров.
23-ноябрда Министрлер кабинетинин төрагасы Акылбек Жапаров долбоордун курулушунун каржы маселеси чечилип жатканын Жогорку Кеңештин жыйынында айткан. Ал Кытай Казарманга чейинки бөлүктү өз алдынча куруп жатканын, Кыргызстан Казармандан Жалал-Абадга чейинки жол үчүн азыр Өзбекстан менен бирге акчанын булактарын аныктап жатканын билдирген.
Өзбекстандын Самарканд шаарында былтыр сентябрда Шанхай кызматташтык уюмунун (ШКУ) саммитинин алкагында Кытай - Кыргызстан - Өзбекстан темир жолунун долбоору боюнча кызматташууга кол коюлган. Ага ылайык, жол тилкеси Кыргызстандын аймагында "Торугарт – Арпа – Макмал – Жалал-Абад" багыты аркылуу өтүүгө тийиш. Бул жолдун жалпы узундугу 280 чакырымды түзөт.
Чүйдөн келген өкүл Кулмакмат Абалбеков Аламүдүн районунда Чүй дарыясынын жээгин бекемдөө зарыл экенин айтты.
"Эгемендик жылдарынан бери бул маселе айтылып келет. Жайыт, айыл чарба жерлери кетип жатат. Мен мамлекеттик бүтүндүккө доо кетирип жатат деп айтаар элем. Айылдын 14 чакырым жерин 950 метрин тездик менен суу жеп атат. Электр көмөк чордону жылды, мүрзөлөрдү көчүргөн учурлар болууда. Василевка айыл аймагынан эле 44 гектар жерди суу жууп кетти", - Абалбеков.
Былтыркы курултайда да Чүйдөн шайланган делегаттар көтөргөн негизги маселелердин бири кыргыз-казак чек арасын бойлой аккан Чүй дарыясынын жээгин бекемдөө болгон. Алар суунун Кыргызстанга караштуу сол тарабы кемирилип, солду көздөй ооп агып, жүздөгөн гектар жер коңшу мамлекетте калганы тууралуу президент Садыр Жапаровго маалымат жеткиргенге аракет кылышкан.
Кыргыз тарап 2013-жылы дарыянын сол жээгин иликтеп чыгып, кооптуу, дамба курулушу керек деген, жалпы узундугу 65,5 чакырымды түзгөн 193 тилкени тактаган. Андан берки он жыл ичинде кооптуу жерлердин аянты көбөйүп, казак тарапта калган жердин аянты кыйла көбөйгөнү айтылган.
"Азаттык" радиосу бул маселе тууралуу атайын иликтөө да тарткан.
Абдипата уулу Жумабек, Баткен облусу: Жаштардын саясаттагы, мамлекеттик иштеги активдүүлүгүн көтөрүү максатында айылдык жана парламенттик шайлоолордо жаштарга 10% квота берүүнү сунуш кылам.
Министрлер кабинетинин төрагасы Акылбек Жапаров келерки жылы Кыргызстанда 212 мектеп, 50 бала бакча ачыла турганын билдирди. Бул тууралуу 15-декабрда Бишкекте өтүп жаткан Элдик курултайдагы баяндамасында айтты.
