"Ала-Тоо 24" телеканалынын эмгек жамааты иш таштады
Коомдук телеканалдын "Ала-Тоо 24" жаңылыктар каналынын элүүдөн ашуун кызматкери иш таштады. Алар муну телеканалга жаңы келген жетекчи Чынар Капарова менен иштешүүнү каалабаганы менен түшүндүрүшүүдө. Жамаат "Ала-Тоо 24" каналынын кызметкерлери Координациялык кеңешке, азыркы бийликке келген атуулдарга кайрылуу жолдоду.
Анда: "Өздөрүн элдин атынан келдик деген адамдардын тобу башаламандык уюштуруп, продюсерди мыйзамсыз кызмат ордунан кетирип, шайлоого аттанган “Бир бол” партиясынын өкүлдөрү мамлекеттик стратегиялык объект болгон “Ала-Тоо 24” каналын басып алууга аракет кылышты. Координациялык кеңеш мамлекеттик кызмат орундарын ээлеп алууларды мыйзамсыз деп атады. Координациялык кеңеш эч кимди, эч жакка басып алууга жибербегендигин айтты. Бирок, өздөрүн элдин атынан деп тааныштырган 20 чакты адам бир каналдын тагдырын чечүүдө. Кечээки митинг кресло талаш үчүн болду беле?! Башаламандыкка ким жооп берет?! Мыйзам кайда калды?!" деп жазылган.
Кайрылууда белгиленгенге караганда "Бир Бол" партиясынын шайлоо тизмесиндеги журналист Чынара Капарованы тарапташтары "Ала-Тоо 24" каналынын продюсери кызматына дайындашкан.
Каналдын продюсери Сюита Соурбаева каналдын элүүдөн ашуун кызматкери учурда Координациялык кеңештин мүчөлөрү менен жолугушууну көздөп жатышканын "Азаттыкка" билдирди.
Мурдараак Коомдук телерадио корпорациясынын жетекчисинин милдетин аткаруучу болуп Жылдыз Бакашева дайындалганы, ал эми "Кыргыз радио бирикмесинин" жетекчиси Мирлан Самыйкожо ордунда калганы кабарланган.
Жаштар люстрацияны талап кылууда
Бишкектеги Кожомкул атындагы спорт сарайынын алдында жаштар чогулуп, Координациялык кеңешке жаштар менен аялдардын кирбей калганына нааразычылыгын билдиришти.
Чогулган жаштардын атынан сөз сүйлөгөн алып баруучу Эркин Рыскулбеков: "Биз бийликти, креслону сурабайбыз. Биз бул төңкөрүштү жасаган жаштарга орун берүүнү суранабыз. Татыктуу аялдар, жаштар бар. Бирок Координациялык кеңеште 2005-2010-жылдагы революцияда да жүргөн адамдар кирип алган. Бул кеңеште жаштар менен аялдардын кирүүсүн талап кылабыз", - деп, митингге баргандарды чагымга алдырбай, тынчтык жүрүшкө чакырды.
5-октябрда Бишкекте анын жыйынтыгына нааразы партиялар митинг өткөрүп, натыйжада митингчилер президенттин жана парламенттин кеңсесине кирип барышкан.
Президент 6-октябрда видео кайрылуу жолдоп, шайлоонун шылтоосу менен бийликти басып алуу аракети болгонун айтты. Бишкек, Ош, Жалал-Абад, Каракол шаарларында каршылык акциялары уланууда.