Чек арадан көчүрүлгөндөргө жардам берилүүдө
Кыргызстандагы Кызыл Жарым Ай коомунун Ош жана Жалал-Абаддагы кошумча ыкчам топтору Баткенге жөнөп кетишти. Алар чек арадагы кырдаалга байланыштуу коопсуз айылдарга көчүрүлгөн тургундарга ысык тамак, жылуу кийим-кечек жагынан жардам беришет. Эвакуация болгондорго жеринен психосоциалдык колдоо көрсөтүлөт. Аталган уюмдан билдиришкендей, балдарга, аялдарга кийим, бинт, гигиеналык каражаттар (памперс) жөнөтүлдү.
27-январда уюмдун Баткендеги командасы көчүрүлгөн тургандарга тамак-аш, суу, гигиеналык каражаттар жана күйүүчү май жагынан жардам көрсөткөн.
Өзгөчө кырдаалдар министрлиги Баткенде чек арадагы кырдаалга байланыштуу болжол менен 11 миң 52 жергиликтүү тургун эвакуацияланганын билдирген. Алардын 10 миң 410у коопсуз аймактагы үйлөргө көчүрүлсө, 642 адам убактылуу түзүлгөн пункттарга жайгаштырылды.
Баткенде кыргыз-тажик чек ара тилкесиндеги куралдуу кагылышта үзүлгөн электр чубалгыларын оңдоп-түзөө иштери башталды. Бул тууралуу Кыргызстандын Энергетика министрлигинин басма сөз кызматы кабарлады. Маалыматта "Ошэлектрдин" кызматкерлери Баткендин жарык өчкөн аймактарында оперативдүү түрдө иштеп жатканы, жакын арада ар бир үйгө жарык бериле турганы айтылат.
Министрлик буга чейин электр линиялары тажик тарап ок чыгаргандан кийин жабыркаганынын билдирген. Анын айынан Ак-Сай, Көк-Таш, Орто-Бос, Жаңы-Бак, Таш-Тумшук, Көк-Терек айылдарында жарык өчүп калган.
Кыргызстандын Саламаттык сактоо министрлиги кыргыз-тажик чек арасындагы атышууда жалпысынан 12 кыргызстандык жаран жабыркаганын тактады. Мекеме тараткан маалыматта алардын абалы орточо оор экени, баары облустук ооруканага жаткырылганы айтылат.
Буга чейин 11 кыргызстандык аскер жараат алганы кабарланган эле.
Тажикстандын "Ховар" маалымат агенттиги жаңжалда эки тажик жараны мерт болуп, дагы 10 адам жараат алганын, анын алтоо аскер, төртөө жайкын тургун экенин жазган.
Соңку жаңжалга байланыштуу Баткенде чек арадагы Достук айылында 28-январда эки өлкөнүн өкмөт өкүлдөрүнүн жолугушуусу өттү.
Кыргызстандын Министрлер кабинетинин орун басары, Улуттук коопсуздук комитетинин (УКМК) башчысы Камчыбек Ташиев анда атышууну териштирип-иликтөө үчүн эки тараптуу комиссия түзүү чечими кабыл алынганын билдирди.
Чек арадагы жаңжал эки тараптуу иликтене турганын Кыргызстандын Министрлер кабинетинин орун басары, Улуттук коопсуздук комитетинин (УКМК) башчысы Камчыбек Ташиев Баткенде, чек арадагы Достук айылындагы эки тараптуу сүйлөшүүлөрдөн кийин билдирди.
"Өзгөчө кырдаалдар министрлигине кечээки окуядан улам үйлөрүнөн качкан жарандарды кайра алып келүү тууралуу тапшырма берилди. Алар бүгүн кече чейин өз үйлөрүндө болуп калышы керек. Чек арага жакын алынып келген күч түзүмдөрүн кайра өздөрүнүн бөлүктөрүнө кайтаруу тууралуу чечим кабыл алынды. Чек арада бир гана Чек ара кызматынын жана коомдук тартипти сактоо үчүн милициянын жергиликтүү бөлүмдөрүнүн кызматкерлери гана калат", - деди Ташиев.