Жо Байден президент катары биринчи сөзүндө АКШ демократиянын жеңишин белгилеп жатканын билдирди. "Кошмо Штаттарда демократия назик экенине күбө болду, бирок бүгүн ал жеңди", - деди.
Байден элди биримдикке чакырып, ар бир америкалыктын президенти болууга убада берди. Ага добуш бергендердин да, добуш бербегендердин да кызыкчылыктарын тегиз коргой турганын белгиледи.
Инаугурациядан кийин Байден менен Харрис Арлингтондогу улуттук көрүстөндө белгисиз жоокердин мүрзөсүнө гүлчамбар коюшмакчы. Андан кийин президент биринчи токтомдор менен буйруктарга кол коёт.
Байдендин өткөөл мезгилдеги командасы билдиргендей, кеп Дүйнөлүк саламаттыкты сактоо уюму менен кызматташтыкты калыбына келтирүү, Париж келишимине кайра кошулуу, бир нече мамлекеттин, көбүнчө мусулман өлкөлөрдүн жарандарына АКШга кирүүгө чектөөнү алуу, расалык теңдикти камсыздоо иштерин күчтөндүрүү жана башка чечимдер тууралуу жүрүп жатат.
Байден америкалыктарды “патриоттук милдетин” аткарып, коронавирус менен күрөшүү үчүн беткап тагынып жүрүүгө үндөйт деп күтүлүүдө.