Лос-Анжелесте добуш берүүгө келген шайлоочулардын көңүлүн көтөргөн музыканттар
Президент Трамп америкалыктарды добуш берүүгө чакырды:
АКШда шайлоо күнү биржаларда акциялардын баасы көтөрүлдү
3-ноябрда АКШнын бир катар фондулук биржалары бир нече пайыздык жогорулоо менен жабылды. “France-Presse” жаңылыктар агенттиги кабарлагандай, президенттик шайлоо күнү “Dow Jones” индекси 2,1 пайызга көтөрүлүп, өткөн аптадагы жоготуулардын бир бөлүгүн калыбына келтирди.
“S&P 500” биржасы 1,8 пайызга, технология компаниялары көпчүлүктү түзгөн “NASDAQ” индекси 1,9 пайызга жогорулады.
Кошмо Штаттарда президенттик шайлоо жүрүп жатат. Анда Республикалык партиядан президент Дональд Трамп жана Демократиялык партиядан мурдагы вице-президент Жо Байден ат салышууда.
Кайсы бир талапкер шайлоону жеңип чыгышы үчүн шайлоочулар коллегиясындагы 538 добуштун кеминде 270ине ээ болушу керек. Быйыл коронавирус пандемиясына байланыштуу 100 миллиондой шайлоочу алдын ала добуш берди. Мындан улам адистер айрым штаттарда шайлоонун толук жыйынтыгы дароо чыгарылбай турганын, себеби добуш саноого көбүрөөк убакыт кетерин билдирип жатышат.
Алгачкы добушканалар жабыла баштады
Кошмо Штаттардын чыгыш тарабындагы Индиана жана Кентукки штаттарында айрым добушканалар жабыла баштады. Бир сааттан кийин кайсы талапкерге добуш берери акырына чейин белгисиз болуп турган Флорида штатында да шайлоо жыйынтыкталат.
Бирок бир топ штаттарда добуш берүү дале уланууда. Маселен Аляскада шайлоо Бишкек убактысы боюнча чак түшкө чейин токтобойт.