Кыргызстандагы жеке курулуш компаниялардан мамлекеттин баласына 1180 батир алынды. Бул тууралуу президенттин иш башкармалыгынын башчысы Каныбек Туманбаев маалымат жыйынында билдирди.
Ал ондон ашуун компания мыйзамсыз менчиктеп алган жер тилкелерине үй тургузушканын, ал тилкелерге башка объектилер курулууга тийиш болгонун белгиледи:
"Мисалы, бул жер тилкеде балдар үйү курулушу керек болчу, бирок курулуш компаниясы аны мыйзамсыз алып, өздөрүнүн үйлөрүн курушкан. Мына бүгүн ошол компаниялар мыйзамсыз курулган объектилерин мамлекетке өткөрүп беришти".
Туманбаев айрым курулуш компанияларын атады, арасында "Кут", "Олокон", "Дубай", "Мурас", "Аалам строй", "Артвин строй" жана башкалар бар.
Каныбек Туманбаев Мамлекеттик ипотекалык компания да кыргызстандыктар үчүн 42 миң батир куруп жатканын билдирди. Анын сөзүнө караганда, бул батирлердин алгачкылары быйыл декабрь айында ээлерине тапшырылат. Мамлекеттик ипотекалык компаниянын батирлери эки түрдүү баада: үлүшчүлөр үчүн чарчы метри 1400 доллардан, кезекте тургандарга 700 доллардан сатылат.
Иш башкармалыктын башчысынын сөзүнө караганда, учурда 38 миң адам ипотекалык батир алуу үчүн кезекте турат.
Улуттук коопсуздук боюнча мамлекеттик комитет (УКМК) буга чейин Кыргызстанда мыйзамсыз курулган, уюшкан кылмыштуу топторго, коррупцияга айыпталган мурдагы бажычы Райымбек Матраимовго тиешеси бар ишканалар курган деген жүйө менен Бишкек, Ош, Чолпон-Ата шаарларынан ондогон турак жайлар мамлекетке өткөрүлгөнүн билдирген.
(ZKo)
Шерине