Бишкек шаарындагы билим берүү мекемелеринин иш тартибин өзгөртүү менен шаардагы жол тыгыны азайды. Бул тууралуу мэриядан "Азаттыкка" 12-сентябрда маалымдашты.
Ага ылайык, борбор калаада 121 мектепте 228 миңден ашуун бала окуса, анын ичинен 90,5 миң бала өзү жашабаган аймактагы мектепке барат. Чүй облусунун айылдарынан 7 842 окуучу шаарга келип окуйт.
Бишкекте 136 кесиптик жана жогорку билим берүүчү окуу жайларда 167 727 студент бар.
"1-сентябрдан тартып шаардагы 121 мектептин 44ү саат 7:30дан тартып окууга өттү. Жогорку окуу жайларда сабактар негизинен саат 10:00дө башталат. Ушундан улам мектеп окуучуларынын 40% окууга баруу үчүн жолго 6:30-7:00дө чыгышат. Калган 60% 7:00-7:30 чамасында чыгышат. Бул эртең мененки кымгуут учурунда шаардагы жолдордо автоунаалардын жана автобустардын бирдей жүрүшүнө шарт түздү", - деп белгиледи мэрия.
Шаар бийлиги студенттердин 10:00дөн тарта окуй баштаганы да коомдук транспорттогу тыгынды азайтууга мүмкүнчүлүк берди деп эсептейт.
"Студенттердин 30% өз автоунаасы менен сабакка барат. Алар саат 9:00дө жолго чыгышат. Демек, жолдордогу автоунаалар кымгуут учурда 30% азайды деп айтууга болот", - деп жазылган мэриянын маалыматында.
Шаар бийлиги коомдук транспорт - автобустар түнкү саат 12ге чейин жүрүп жатканын кошумчалады.
Июлдун соңунда Министрлер кабинетинин токтому менен Бишкектеги мектептерде сабактар саат 8:00дөн эрте башталмай болгон. Ошол эле документте борбор калаадагы кесиптик билим берүү мекемелеринде окуу саат 10:00дөн эрте башталбашы керектиги жазылган.
Бишкек шаарынын мэриясы жаңы окуу жылынан баштап калаада 44 мектепте сабактар саат 7:30да башталарын билдирген.
Бишкекте жаңы графикке нааразы болгон студенттер петицияга кол топтой баштады.
Жогорку Кеңештин айрым депутаттары да 11-сентябрдагы отурумда окуучуларды жана студенттерди үч смен менен окутуу чечимин сындап, аны жокко чыгарууну сунушташты.
- Социалдык тармактарда, коомчулукта, парламентте сентябрдан тартып тыгын азайбай, кайра күч алганын, мурда бат жетчү райондорго баруу үчүн азыр сааттап тыгында турушканын айтып, жазгандар, сүрөт-видеолорун жарыялагандар көп. Тыгын маселесин чечүү талабы ушул аптада парламентте да көтөрүлгөн. (ZKo)
