Сүттүн баасы Жогорку Кеңештин тармактык комитетинде талкууланды. Эл өкүлдөрү буга чейин да бул маселени карап, Министрлер кабинетине фермерлер үчүн бирдиктүү бир бааны коюуну тапшырган болчу. Жыйынга катышкан өкмөт мүчөлөрү сүткө бекитилген бир баа коюш азырынча мүмкүн эместигин айтышты. Студиябызда Жогорку Кеңештин депутаты, экономика министринин мурдагы орун басары Элдар Абакиров, Суу ресурстары, айыл чарба жана кайра иштетүү өнөр жайы министрлигинин азык-түлүк коопсуздугу бөлүмүнүн башчысы Данияр Жанузаков жана Кыргызстандын Сүт палатасынын төрагасы, “Жыргал сүт” кооперативинин жетекчиси Нурбек Жыргалбаев.