Түндүк Македонияда президенттик кызмат үчүн ат салышуу жана үгүт өнөктүгү 4-апрелде расмий башталды. Жети талапкердин арасынан бирин тандоо үчүн эки айлампалык добуш берүү уюштурулат.
Добуш берүү май айында, 8-майдагы жалпы шайлоо менен жыйынтыкталат. Биринчи айлампасы 24-апрелде өтөт.
Баштапкы сурамжылоонун тыянагы көрсөткөндөй, экинчи мөөнөткө талапкерлигин коюп жаткан азыркы президент, башкаруучу социалд-демократтар партиясынын өкүлү Стево Пендаровский жана негизги оппозициялык борборчул-оңчул коалиция көрсөткөн Гордана Силяновская-Давкова алдыда келе жатышат.
Силяновская-Давкова 2019-жылы да президенттик шайлоого катышкан.
Бул өлкөдө президент церемониалдык кызмат деп эсептелет. Ал беш жылдык мөөнөткө шайланат.
Түндүк Македония мурдагы Югославиядан бөлүнүп чыккан өлкөлөрдүн бири. 1991-жылдагы референдумда македониялыктар Югославиядан чыгуу тууралуу чечим кабыл алышкан.
Токсонунчу жылдардын башында мурдагы Югославиянын курамына кирген өлкөлөрдөгү улут аралык куралдуу жаңжал 100 миңден ашуун адамдын өмүрүн алып кеткен, миллиондогонун үй-жайсыз калтырган.
Түндүк Македония азыр Евробиримдикке талапкер деген макамга ээ тогуз өлкөнүн бири, калгандары - Албания, Босния жана Герцеговина, Грузия, Молдова, Черногория, Сербия, Түркия жана Украина. (RK)
