Быйылкы 1-мартка карата "Микро, чакан жана орто ишканаларды чукул колдоо" долбоорунун алкагында 6 млрд 249 млн 025 миң 918 сом үстөк пайызсыз насыя берилди. Бул тууралуу Финансы министрлиги маалымдады.
Пайызсыз насыяны 9 288 ишкер алды. Алардын ичинен 8 110 ишкерге 1-категориядагы 1 млн сомго чейинки насыя берилген, жалпы суммасы - 4 млрд 471 млн 987 миң 243 сом. 1 178 ишкерге 2-категориядагы 3 млн сомго чейинки - жалпы суммасы 1 млрд 777 млн 38 миң 675 сомду түзгөн насыя берилди.
Чакан ишкерликти колдоого багытталган пайызсыз насыя долбоору 2027-жылдын июлуна чейин ишке ашырылат.
Маалыматта үстөк пайызсыз насыянын кайтаруу мөөнөтү жана алуу шарттары ачыкталган эмес.
2023-жылы Финансы министрлиги чакан жана орто ишкерликти колдоо долбоорлору үчүн бюджеттен 2 млрд сом бөлгөн.
Ишкерлер жер-жерлерде өкмөт убада кылган пайызсыз же пайызы төмөн насыялар аз берилип жатат деп нааразылыгын айтып келишет.(ZKo)
