Облустук Ички иштер башкармалыгынын маалымат кызматы билдиргендей, 20-февралда Түп районунун тургуну милицияга арыз менен кайрылган.
Ал 2008-жылы туулган уулун мектеп директору кабинетине киргизип, кол көтөрүп, сөгүп, денесине жараат келтиргенин айткан. Арыз ээси буга байланыштуу чара көрүүнү өтүнгөн.
“Арыз каттоого алынып, соттук-медициналык экспертиза дайындалган. Териштирүү иштеринин жүрүшүндө окуучу мектеп директорунун сабагына кечигип кирген жана сырткы кийимин чечпей телефон кармап отуруп алган. Буга ачууланып, окуучуну чаап ийгенин мектеп директору өзү айтууда”, - деп жазылган маалыматта.
Экспертизалардын жыйынтыгы менен окуяга юридикалык баа берилери да айтылды.
Кыргызстанда буга чейин да мугалим окуучуга кол көтөргөн окуялар катталган.
Январь айында “Сапат” билим берүү мекемесинин Кызыл-Кыя шаарындагы Исхак Раззаков атындагы лицейинде окуучуну сабаган деп шек саналып жаткан мугалим жумуштан алынып, милиция жүргүзгөн териштирүү учурунда мугалим дагы жети баланы токмоктогону аныкталган.(KS)
