Орусиянын Пенза шаарынын чоң жолунда 4-февралда автокырсык катталган. Анда Кыргызстандын эки жараны каза таап, Орусиянын жараны оор жаракат алган.
Бул тууралуу Кыргызстандын Тышкы иштер министрлиги (ТИМ) 7-февралда кабарлады.
Маалыматка ылайык, каза болгон кыргызстандыктардын сөөгү мекенине жеткирилди. Ал эми орусиялык жаран оорукананын жандандыруу бөлүмүндө жатат.
ТИМдин маалыматында автокырсык жана андан набыт болгон кыргызстандык жарандар тууралуу кеңири маалымат берилген эмес.
Былтыр 27-июнга караган түнү Орусиянын Самара облусундагы трассада болгон автокырсыктан алты киши каза тапкан. Алардын экөө кыргызстандык жана төртөө өзбекстандык жарандар.
2022-жылы 21-августта Орусиянын Ульяновск облусундагы катуу жол кырсыгында 16 адам, анын ичинде 14 кыргыз жараны мерт болуп, үчөө жараат алган. (ZKo)
