Орусия оккупациялап алган Луганск облусунун Лисичанск шаарындагы аткылоодо бери дегенде 20 адам каза болгону кабарланууда.
Орусиянын Өзгөчө кырдаалдар министрлиги алардын сөөгү урандылардын астынан чыгарылганын 4-февралга караган түнү кабарлады. Кеминде 10 киши жабыркаганы айтылат. Калаадагы Орусия дайындаган бийликтин жана орус агенттиктеринин маалыматына караганда, 3-февралда наабайкана жайгашкан имарат аткыланган.
Өзүн Луганск элдик республикасы деп атаган аймактын жетекчилиги аткылоону Украина армиясынан көрүүдө. Киев буга комментарий бере элек.
Лисичанск шаарын Орусия 2022-жылдын жазында оккупациялаган. Калаа фронттон болжол менен 10-15 км алыста.
Украинанын Орусия оккупациялап алган аймактарында, өзгөчө фронт сызыгына жакын жерлерде аткылоодон карапайым адамдар жапырт каза болгон учурлар буга чейин да болгон.
Орусия Украинага 2022-жылдын февралында бастырып кирген. Москва муну "орус тилдүүлөрдү коргогон атайын операция" деп атайт. Дүйнөнүн басымдуу бөлүгү бул үчүн Кремлди сындап келатат. (SE)
