2-февралдын түнүндө Бишкек Жылуулук электр борборундагы (ЖЭБ) жарылууда жабыркаган эки адам Түркиядагы атайын клиникага которулат.
Бул тууралуу өкмөттүн Медиа штабы билдирди.
Маалыматка ылайык, 3-февралда Бишкекке Түркиянын Саламаттык сактоо министрлигинин "Голжук" ооруканасынын реаниматолог-дарыгерлери келишти.
"️Доктор Этем Озтурк жана Энгин Четин Кыргызстандын саламаттык сактоо министри Алымкадыр Бейшеналиевдин коштоосунда жабыркагандардын абалы менен таанышты, аларды дарылоо ыкмаларын караштырып, жыйынтыгында консилиум болду. Доктор Этем Озтурк бейтаптардын абалы оор экенин белгилеп, узак дарылоо талап кылынарын айтты. Ал ошондой эле катуу күйүп калган бейтаптарды дарылоо үчүн толук шарттары бар атайын ооруканага которууну эскертти. Консилиумдун аягында жабыркаган эки жаранды Түркиядагы атайын ооруканага которуу чечими кабыл алынды", - деп жазылган маалыматта.
Министр Бейшеналиевдин сөзүнө караганда, түркиялык дарыгерлер Кыргызстанга президент Садыр Жапаровдун тапшырмасы жана Саламаттык сактоо министрлиги менен келишимдин негизинде келген.
Министрлер кабинетинин төрагасы Акылбек Жапаров бүгүн, 3-февралда Бишкек жылуулук электр борборунун (ЖЭБ) жарылуу болгон бөлүгүндөгү калыбына келтирүү иштери менен таанышты. Бул тууралуу өкмөттүн Медиа штабы кабарлады.
Мурдараак ЖЭБдеги кырсыктан кийинки калыбына келтирүү иштерине 100дөн ашык куруучу тартылганы кабарланган.
Акылбек Жапаров 2-февралда кечке жуук ЖЭБдин айланасындагы кырдаал боюнча ыкчам штабдын жыйынына да катышкан. Жыйында жылуулук борборундагы жарылуунун бир нече себеби такталганы айтылганы менен кайсы себептер экени ачыкталган эмес.
3-февралдын таңында Бишкек жылуулук электр борборунда жалпы 245 мегаватт кубаттуулукта алты от казан иштеп жатканы кабарланган. Түтүктөгү суунун ЖЭБден чыгып жаткандагы температурасы 68 градуска чейин жеткен. Жылуулук борборунда жалпы 15 от казан бар.
Бишкек Жылуулук электр борборундагы (ЖЭБ) жарылуудан жабыркаган эки адамдын абалы оор бойдон калууда. Үчүнчү жабыркаган адамдын абалы туруктуу. Бул тууралуу Саламаттык сактоо министрлигинин басма сөз кызматы кабарлады.
2-февралда таңкы саат үчтөр чамасында ЖЭБде жарылуу болуп, беш адам Бишкектеги "Тез жардам" борборуна түшкөн. Эки киши үйүнө дарыланууга жөнөтүлгөн, дагы экөө жандандыруу бөлүмүнө жаткырылган. Бир бейтап палатага жайгаштырылган.
Социал-демократтар партиясынын лидери Темирлан Султанбеков Фейсбуктагы баракчасына мурдагы президент Алмазбек Атамбаев курган жаңы Жылуулук электр борбору (ЖЭБ) Бишкек шаарын эки жолу кышкысын тоңуп калуудан сактап калганын жазды.
Султанбеков Бишкек ЖЭБинин аймагына Алмазбек Атамбаевдин тушунда кубаттуулугу 300 мегаваттык жаңы кошумча ЖЭБ курулганын, ал Борбор Азиядагы эң арзан курулган ЖЭБ болгонун белгиледи.
"Мына ушул эски ЖЭБдин аймагында жайгашып, автономдуу иштеген жаңы ЖЭБ 2018-жылы да катуу суукта Бишкекти тоңуп калуудан сактаган. Азыр да сактап турат. Жаңы ЖЭБдин 1 мегаватты бизге 1,28 млн долларга, жалпы 300 мегаватт 386 млн долларга турган. Бул Борбор Азия аймагындагы эң арзан ЖЭБ, анткени акыркы он жылда Борбор Азияда үч эле ЖЭБ курулду - бирөө Тажикстандын борборунда, экөө Казакстандын Караганды жана Семей облустарында. Дүйшөмбү шаарындагы ЖЭБдин 1 мегаватты тажик коңшулар үчүн 1,32 млн долларга түшсө, Казакстандын Караганды облусундагы ЖЭБдин 1 мегаватты 2,31 млн долларга, Семейдеги 2,88 млн долларга турган", - деп белгиледи Султанбеков.
Социал-демократтар партиясынын лидери Эл аралык энергетика агенттигинин маалыматында, 1 мегаватт энергиянын орточо баасы 1,3 млн доллар болорун белгилеп, Кыргызстандагы жаңы ЖЭБ арзан жана сапаттуу курулганын, абаны булгабай турганын жазды.
2-февралда таңкы саат үчтөр чамасында Бишкектеги ЖЭБде жарылуу болуп, беш адам жабыркаган. Борбор калаада жылуулукка чектөө киргизилип, ысык суу токтогон. Президент Садыр Жапаров жылуулук борборунун абалы менен таанышкандан кийин "Кабар" агенттигине маек курган. Ал кырсык ЖЭБдин эски бөлүгүндө болгонун айтып, мурдагы бийликтерди 386 миллион долларга чала-була иш кылгандан көрө, "жаңы ЖЭБ курса болмок" деп айыптаган.
"Кошуна өлкөдөгүдөй 300 миллион долларга жаңы ЖЭБ куруп коюш керек эле. Ал эми жаңы блоктор курулбаганда абал мындан оор болмок дегендер – бет тырмарлык кылгандар", - деген президент.
2018-жылы 26-январда катуу суукта ЖЭБде чоң авария болуп, Бишкек бир нече күн бою жылуулуксуз, бир топ жери жарыксыз калган. Ошондон кийин ишкананы оңдош үчүн ага чейинки бийликтин тушунда Кытайдын “Эксимбанкынан” алынган 386 миллион доллар насыянын бир тобу кымырылып кеткени ачыкка чыккан. Бул боюнча кылмыш иши козголуп, бир нече аткаминер камакка алынып, жоопко тартылган.