3-февралдын таңына карата Бишкеке жылуулук электр борборунун (ЖЭБ) жалпы кубаттуулугу — 245 мегаваттка көтөрүлдү. Бул тууралуу Энергетика министрлиги маалымдады.
Ага ылайык, 3-февралда дагы бир от казан жана агрегат ишке киргизилет. Учурда алты от казан жана үч агрегат иштеп жатат. Түтүктөгү суунун ЖЭБден чыгып жаткандагы температурасы 68 градуска чейин жогорулады.
Жылуулук борборунда жалпы 15 от казан бар.
2-февралда таңкы саат үчтөр чамасында ЖЭБде жарылуу болуп, беш адам Бишкектеги "Тез жардам" борборуна түшкөн. Экөөнүн абалы оор болгондуктан жандандыруу бөлүмүндө жатат. Бир бейтаптын абалы орточо оор деп бааланууда. Эки киши үйүнө дарыланууга жөнөтүлдү.
Ушу тапта жылуулук борбордун кызматкерлери кырсык эмнеден болгонун аныктоо жана анын ишин калыбына келтирүү аракетин көрүүдө. ЖЭБде өзгөчө кырдаал режими жарыяланды.
2-февралда өзгөчө кырдаалдар министри Бообек Ажикеев Бишкекте өткөн басма сөз жыйынында ЖЭБдеги абал 5-7 күн ичинде жөнгө салынарын айтты.
Садыр Жапаров Бишкек жылуулук борборуна барып, кырсыктан кийин ал жайды калыбына келтирүү иши менен таанышкан.
Башкы прокуратура ЖЭБдеги жарылуу боюнча кылмыш ишин козгогону белгилүү болду.
Бишкек жылуулук борборундагы жарылууну мамлекеттик комиссия иликтейт
Бишкек жылуулук борборундагы аварияда имараттын бузулган жерлерин калыбына келтирүүгө 100дөн ашык куруучу тартылды. Бул тууралуу ыкчам штабдын 2-февралдын кечиндеги жыйынында Архитектура, курулуш жана турак жай-коммуналдык чарба мамлекеттик агенттигинин директору Нурдан Орунтаев маалымдады.
Министрлер кабинетинин төрагасы Акылбек Жапаров катышкан жыйында жылуулук борборундагы жарылуунун бир нече себеби такталган. Бирок өкмөттүн маалыматында кайсы себептер экени жазылган эмес.
Акылбек Жапаров кырсыкты изилдөө үчүн мамлекеттик комиссия түзүлүп, аны Министрлер кабинетинин төрагасынын орун басары Бакыт Төрөбаев жетектей турганын билдирди. Мындан тышкары жарылууну териштирүүгө көмөктөшүү үчүн Орусиядан адистер келе турганы белгилүү болду.
Жыйында мамлекеттик мекемелерге медициналык жайларды, реабилитациялык борборлорду жана башка социалдык объектилерди жылуулук менен толук камсыз кылуу сыяктуу тапшырмалар берилди.
Мунун алдында өкмөттүн медиа штабы Бишкек жылуулук электр борборунда 12-от казан ишке киргизилгенин, ошону менен жалпы алты от казан иштей баштаганын билдирген. Түтүктөгү суунун ЖЭБден чыгып жаткандагы температурасы 65 градуска чейин жетип калганы кабарланды. Жылуулук борборунда жалпы 15 от казан бар.
Жабыркагандарды дарылоо үчүн түркиялык дарыгерлер келет
Жарылууда жабыркаган кызматкерлерди дарылоо үчүн 3-февралда Түркиядан эки дарыгер келет. Бул тууралуу өкмөттүн медиа штабы билдиргендей, зарыл болсо бейтаптар Түркияга жөнөтүлүшү мүмкүн.
Маалыматта саламаттык сактоо министри Алымкадыр Бейшеналиев Түркиянын Саламаттык сактоо министрлиги менен байланышканы, түркиялык тажрыйбалуу комбустиолог Корай Даш менен онлайн кеңешме өткөрөрү айтылат.
2-февралда таңкы саат үчтөр чамасында ЖЭБде жарылуу болуп, беш адам Бишкектеги "Тез жардам" борборуна түшкөн. Алардын экөөнүн абалы оор болгондуктан жандандыруу бөлүмүндө жатат. Бир бейтаптын абалы орточо оор деп бааланууда. Эки киши үйүнө дарыланууга жөнөтүлдү.
Ушул тапта жылуулук борбордун кызматкерлери кырсык эмнеден болгонун аныктоо жана анын ишин калыбына келтирүүнүн аракетин көрүүдө. ЖЭБде өзгөчө кырдаал режими жарыяланды.
Башкы прокуратура Бишкек жылуулук борборундагы жарылуу боюнча кылмыш ишин козгоду
Башкы прокуратуранын маалымат кызматы Бишкек жылуулук электр борборундагы жарылуу боюнча кылмыш иши козголгонун билдирди. Маалыматта айтылгандай, башкы көзөмөл органы жарылуу ЖЭБдин кызмат адамдары "өздөрүнө жүктөлгөн милдетин так аткарбаганы жана магистралдык түтүк өткөргүчтөрүн эксплуатациялоодо коопсуздук эрежелерин сактабаганы үчүн болду" деп эсептейт.
Бул кырсыктын айынан Бишкек шаарындагы турак жайларды, мекемелерди, ишканаларды жылуулук менен камсыздоо үзгүлтүккө учураган жана мамлекетке өзгөчө ири өлчөмдө зыян келтирилгени жазылган.
Бул боюнча Башкы прокуратура Кылмыш-жаза кодексинин 245-беренеси (“Коммерциялык же башка уюмдардын кызматчыларынын ыйгарым укуктарын кыянаттык менен пайдалануусу”), 317-беренеси (“Магистралдык түтүк өткөргүчтөрүн курууда, эксплуатациялоодо же оңдоодо коопсуздук эрежелерин бузуу”), 337-беренеси (“Кызмат абалын кыянаттык менен пайдалануу”) беренелери менен кылмыш ишин козгоп, тергөө жүргүзүүнү УКМКга тапшырды.
Ошондой эле ЖЭБдеги кырсыкта террордук акт жана диверсия белгилери аныкталбаганы жазылган.
2-февралда таңкы саат үчтөр чамасында ЖЭБде жарылуу болуп, беш адам Бишкектеги "Тез жардам" борборуна түшкөн. Алардын экөөнүн абалы оор болгондуктан жандандыруу бөлүмүндө жатат. Бир бейтаптын абалы орточо оор деп бааланууда. Эки киши үйүнө дарыланууга жөнөтүлдү.
Ушул тапта жылуулук борбордун кызматкерлери авариялык абалдын келип чыгуу себептерин аныктоо жана калыбына келтирүү боюнча иштерди жүргүзүп жатат. ЖЭБде өзгөчө кырдаал режими жарыяланды.
2-февралда өзгөчө кырдаалдар министри Бообек Ажикеев Бишкекте өткөн басма сөз жыйынында ЖЭБдеги абал 5-7 күндүн ичинде жөнгө салынарын айтты.