Индияда асынып алганы айтылган кыргызстандык 32 жаштагы аялдын сөөгү мекенине алып келинди жана жакындарына берилди. Бул тууралуу Тышкы иштер министрлиги 10-январда билдирди.
Кыргызстандык турист аялдын сөөгү Ришикеш шаарындагы отелден табылганын The Times of India басылмасы 7-январда жазган. Полиция ал кондиционердин шнуруна асынып алганын белгилеп, өз жанын кыйганын ырастаган.
Маалыматтарга караганда, кыргызстандык аял туристтердин тобу менен медиациялык программанын алкагында аталган шаарга 12-декабрда барган. Курс жыйынтыкталгандан кийин, 2-январда ал Holiday Home отелине жайгашкан, бирок эртеси дайынсыз жоголгон. Анын сөөгү Raj Resort мейманканасынан табылган. Индиялык басылма маркумдун курбусунун сөздөрүнө таянып, ал акыркы күндөрү үй-бүлөлүк көйгөйдөн улам тынчсызданып жүргөнүн жазды.
Тышкы иштер министрлиги жана Кыргызстандын Индиядагы элчилиги бул окуянын чоо-жайынын иликтенишине дыкат көңүл бурулуп жатканын кабарлады. (SE)
