Венгриянын Будапешт шаарына залкар манасчы Саякбай Каралаевдин айкели тургузулду. Бул тууралуу ТҮРКСОЙ эл аралык уюмунун баш катчысы Султан Раев Фейсбуктагы баракчасына жазды.
"Улуу манасчы, миллиондогон эпостун саптарын жүрөгүнө батырып, дүйнөгө тааныткан ал - Саякбай Каралаев! Саякбай атабызга Европанын борборунда айкел тургузулду, болгондо да тамыры, тарыхы, кезегинде заманы бир Мажарстанда (Венгрия) тургузулду", - деп жазды ал.
Анын айтымында, Саякбай Каралаевдин эстелигин тургузуу демилгеси буга чейин Венгриянын парламентинин төрага орун басары Шандор Лежак менен талкууланган.
Айкелди белгилүү мажар айкелчиси Дьёрдьи Лантош жасаган.
Айкелдин ачылыш аземине Кыргызстандын мамлекеттик катчысы Сүйүнбек Касмамбетов, ТҮРКСОЙ Эл аралык уюмунун башкы катчысы Султан Раев, элчилер, илимий интелегенция, жергиликтүү аймактын тургундары, манасчы, дастанчылар катышкан. (КЕ)
